1485/2022-2023

Aizawl, 5th August, 2022 : Vawiin khan Labour Employment Skill Development & Entrepreneurship (LESDE) Department chuan kumin June thla khan 24th World Education Summint 2022, Hyderabad-a neihah “Government Sector Initiative in Skill Development” Award an dawn lawmna programme ITI Auditorium, Aizawlah an hmang a. He hun hi LESDE Minister Pu Lalchhandama Ralte leh Man Power Development Board Vice Chairman Pu Zothantluanga ten an hmanpui a ni.

Pu Lalchhandama Ralte chuan Skill Development -a an thawh that avanga India rama ber nihna lawmman “Government Sector Initiative in Skill Development” Award an dawng thei chu lawmawm a ti a, hemi kawnga thawktu zawng zawng te a lawmpui thu a sawi. ITI atanga training chhuak tam tak ten Mizoram chhungah hlawhtlinnna hrang hrang kawng hrang hrangah an hmu a, banking lamah te, electronic lamah te, sawrkar office thleng pawhin an luah a, Mizoram economy thanna kawngah pawh an thawh hlawk hle, a ti a. Vawiina Award lawmna programme an hman piah lamah Man Power Development Board member te nen ITI hmunhma te fangin thawktute dinhmun leh facility neih dan te, thalai ten an bawh em tih te leh hmalak zel dan tur atana puitu nih beiseia an fan kual thu Minister hian a sawi a.  Sawrkar chuan ITI tihchangtlunna tur sum cheng nuai 77 a release tih sawiin ITI-a mamawh tur hmanrua leh hmunhma tlabal zual te siamthat nan hman a ni dawn, tih a sawi a ni.

LESDE Minister chuan minimum wages rate ennawn a nih thu sawiin a mawhphurtuten uluk taka ruahmanna an siam hnuah minimum wages rate thar peih fel a ni a, Cabinet ngaihtuah turin ruahman mek a ni, a ti a. Mizoram Building & Other Construction Workers Welfare Board (MBOCWWB) chhunga hmalaknaah member inspection neih a ni a. Khawpui chhungah members ennawn hna thawh zawh tawh niin khawpui pawn lamah ennawn a ni leh dawn, tih a sawi bawk.

Pu Zothantluanga chuan Mizo thalaite rilruah thawk loa chhungte chawmhlawm nih hrehawm tihna rilru a piang a, eizawnna hmu turin thiamna skill an mamawh tih an hria a, ITI a zir duh an pung nasa a, admit sen loh zirlai an hmu a ni, a ti a. ITI atanga train chhuak ten skill an neih a, thawh tur an hmuh a, an thiamna hmanga Mizoram mai ni lo India ram chhung leh ram pawn khawpui dangah te eizawnna tha an neih theih nan tan la thar zel turin thawktute a fuih a. Governement Sector ah Skill Development a hma la tha ber Award an dawng thei chu lawmawm a tih thu a sawi a ni.

LESDE hian PMKVY Scheme an kalpui tha hle a. Mi sing chuang tan skill training hlawhtling takin an pe a. Hmun hrang hrangah hnathawhna tur placement an hmuhsak a. Skill Competeion ah achievement tha tak an nei a. Pum leh Kawtchhuah Start Up Competition te hlawhtling takin an buatsaih a ni.

Vawiin programme hi Pu Lalramsanga Sailo, Secretary, LESDE chuan a kaihruai a. LESDE Director Pu K.Lalhmingliana’n report a pe bawk.