1196/2023-2024

2023 Vawkhniahzawn thla ni 19: Mizoram Home Minister Pu Lalchamliana chuan vawiin khan Lawngtlai District chhung Thingkaha 3rd India Reserve (Mizo) Battalion Headquarters chu tlawhin, 3rd IR-a thawktu police-te nen inkawm hona hun an hmang.

Home Minister Pu Lalchamliana hi Aizawl aṭangin a nupui Pi Nuchhungi, Finance Principal Secretary Pu Vanlalchhuanga, Inspector General of Police (Headquarters) Pu John Neihlaia leh a nupui Pi Angeline Lalnunthari, Commissioner of Taxes Pu R. Zosiamliana, Private Secretary to Home Minister Pu H. Lalhruaitluanga leh official leh party hruaitute'n an ṭawiawm a. Lawngtlai lam aṭangin Lai Autonomous District Council-a MDC Pu K. Hre Kung, Lawngtlai SP Pu Lokeshwaran R., Additional SP Pu C. Lalruatkima, SDC Pu Samuel Lalmalsawma Sailo, DIPRO Pu C. Lalhruaitluanga leh official dangte'n ṭawiawm bawkin, Deputy Commandant Pu Jacob Hlychho hovin 3rd IR Battalion-a thawktute'n an lo dawngsawng a ni.

3rd IR Battalion hmuna inkhawm tawi buatsaihah Home Minister Pu Lalchamliana chuan 3rd IR te chu police battalion ṭha tak tia a hriat ṭhin an nih thu sawiin, Assam-a an awm lai pawha an thil ṭha tih leh hna thawh hmanga police leh Mizote tihmingṭhatu an nih avangin a chhuang hle tih a sawi a. Tunah Mizoramah lo letin, Thingkah hmunah Battalion Headquarters ṭha tak an luah thei chu a lawmpui thu sawiin, an battalion hmingṭhatna chu chhawm nung zel turin a chah a. Tun sawrkarah uniform, silai leh an mamawh hrang hrang chungchangah police te a ṭha thei ang bera thuam tura hma an lak thu sawiin, a hlawhtlinna pawh hmuh theiha a awm chu lawmawm a tih thu a sawi bawk.

Home Minister chuan police thawktu indaih lohna nasa tak phuhruk tura hna lak tum a nih mek laia Mizoramin COVID-19 leh harsatna dang dang a hmachhawn avanga hna lak theih a ni ta lo chu pawi a tih thu sawiin, sum harsatna karah sawrkar chuan theih tawp chhuahin police te mamawh ngaihtuah zel a tum thu a sawi a. Mihring nunah thu awihna (discipline) a pawimawh hle a, min khuahkhirha min thununtu an awm lohnaah mahni inthununna (self-discipline) a pawimawh lehzual tih sawiin, fahrah leh hmeithai tam tak siam a, ṭhalaite nun tichhetu ruihhlo laka inthiar fihlim tlat turin police kal khawmte chu a chah a ni.

He huna thu sawitu dang Finance Principal Secretary Pu Vanlalchhuanga chuan sawrkar aṭanga sum hmuh ang ang a nihna taka ṭangkai taka hman a pawimawh thu sawiin, 3rd IR Battalion Headquarters cheibawlna leh inenkawlna chungchangah pawh quality of expenditure chu vawng reng turin a chah a. IGP (Headquarters) Pu John Neihlaia chuan 3rd IR hnuaia thawktute chu duty ngai pawimawh tur leh ram leh hnam leh mahni battalion hmangaihna rilru pu-a theih tawp chhuaha duty hlen chhuak ṭhin turin a chah bawk.

He hun hi 3rd IR Battalion Deputy Commandant Pu Jacob Hlychho chuan kaihruaiin, 3rd IR Battalion dinhmun report a pe a. Hun hman zawhin Home Minister hian 3rd IR Battalion Headquarters hmunhma fangin, Commandant quarters-ah thingpui in ho a ni bawk.

3rd IR Battalion hi kum 2008 May ni 12-ah din niin, kum 2010 January ni 28 aṭanga kum 2023 March ni 28 thleng Assam-ah an awm a. Assam-a an awm lai hian duty ṭha taka an hlen chhuah ṭhin bakah, an thawhna hmuna mi harsate ṭanpui nan ₹ vaibelchhe 1 leh nuai 70 chuang hu ṭanpuina an pe chhuak a ni. Thingkaha Battalion Headquarters hmun hi kumin April ni 12 aṭang khan luah ṭanin, Lawngtlai leh Siaha District hi an mawhphurhna huam chin (area of responsibility) atana ruat a ni a. Battalion Headquarters bakah hian Lawngtlai District chhungah post 5-ah leh Siaha District chhungah post 3-ah an insem darh bawk a ni.