1551/2023-2024

Aizawl, the 17th August, 2023: Home Minister Pu Lalchamliana chuan vawiin chawhnu dar 1 khan a Office Chamber, MINECO-ah 'Thukhawchâng-2' tih lehkhabu, Pu R.Lallianzuala buatsaih chu a tlangzarh. He lehkhabuah hian Dr. J.Liankhûma kutchhuak thuziak hrang hrang dahkhawmna kum 2006 a chhut chhuah, 'Thukhawchang' tih lehkhabu-a chuang lo thuziak tha tak tak 7 dangte dah a ni.

Lehkhabu tlangzarhtu Home Minister Pu Lalchamliana chuan Dr. J.Liankhûma sulhnu chuanna lehkhabu hlu tak 'Thukhawchâng-2' mipuite chhiar theiha peihfel a ni chu lawmawm a tih thu sawiin, lehkhabu tha tak khawrpumtu Pu R.Lallianzuala inpekna leh thahnemngaihna chhuanawm a tih thu a sawi a. Hlawkna tham tak tak awm lo chunga ziakmite'n thahnemngai taka lehkhabu tha tak tak an chhuah zel thin chu fakawm a tih thu a sawi a. Lehkhabu tlangzarh tak chuan Mizo nunphung leh thu leh hla chawisan zel kawngah nasa taka hlawkna a thlen ngei a beisei thu a sawi bawk.

He hun hi Prof. Laltluangliana Khiangte chuan kaihruaiin lehkhabu buatsaihtu Pu R.Lallianzuala hnen atangin buatsaih a nih dan leh lehkhabu thuken tlangpui ngaihthlak a ni a. Pu J. Liankhûma nau Pu Lalkhama, Ex-MLA, IAS (Rtd) in chhungkaw aiawhin kalkhawmte chungah lawmthu a sawi a. Sawm bik kalkhawmte atangin thusawi ngaihthlak a ni bawk.

Vawiina lehkhabu tlangzarh tak 'Thukhawchâng-2' hi copy 1000 chhut niin a man hi Rs. 150/- a ni.