Mizoram sawrkar Home Minister Pu Lalchamliana chuan nimin khan Lawngtlai District chhung Vathuampui khuaa Pang Zirlai Pawl (PZP) bul tuma 'Zoram zalenna sual laia Pangfa martarte hriat rengna lungphun' chu hawngin, martar-te zahna chibai a buk a. Martar chhungte a ral nghal bawk.

Home Minister hi Aizawl atangin DIG (CID) Pu Neihchungnunga IPS leh a thawhpuite, Lawngtlai atangin PWD EE, Bungtlang 'S' BDO, DIPRO, SDPO leh police leh MNF General Headquarters atangin Ex-MLA leh hruaitu thenkhatte'n an tawiawm a ni.

YLA Hall, Vathuampuia lungphun hawnna inkhawm buatsaihah Home Minister chuan 'Zoram zalenna sual avanga nunna chan zawng zawng hi hnam martar an ni' tih chu sawrkar lai MNF party-in a pawm dan a ni tiin, PZP-in Pangfate zinga chuti ang mi zawng chhuak a, hriat rengna lung phun nachang an hria chu lawmawm a tih thu a sawi a. Martarte thisena bual thianghlim party a nih avangin MNF chuan martarte a ngaihlu hle tih sawiin, inthlan manifesto-a tar lan, 'hnam pasaltha leh martar chhungte tan special scheme siam tum a ni ang' tih chu a taka bawhzui a nih dawn thu leh martar 1564 hming chuanna Luangmuala Martarte Thlanmual pawh a aia tha zawka siam tum a nih thu a sawi.

Pu Lalchamliana chuan Mizo mipuite tana tha ber tura a ngaih avangin MNF-in zalenna a sual a, mipuite tana tha ber tura a ngaih avangin India sawrkar nen inremna siam lehin, chu chu tun thlenga vawn him a ni, a ti a. MNF-in mipui ai an awh zo em tih zawhna awm thin chu, khatih laia Mizoram MLA pathuma pahnih chu MNF an nih avangin mipui ai awh zovah an inngai tih a sawi a. Zo hnahthlak zawng zawng rorelna pakhat hnuaia mahni ro inrela kan awm theih nan hma an la zel dawn tih sawiin, tharuma an beih hlawhchham tawh chu tharum tel lova beih chhunzawm zel an tum tih a sawi.

Home Minister chuan tunlaia Vathuampuia India sipai rawn lut chu chi-ai phah lo turin mipuite a chah a. Rambuai lai ang a ni tawh lo va, sipaite chu mipuite veng him tur an nih avangin hlauh tur an awm lo tiin, harsatna an tawk a nih pawha tanpui nghal turin district administration leh sawrkarin mit leh beng a chhi reng a ni, a ti.

Martarte hriat rengna lungphun hawnna inkhawm hi PZP Vice President Pu James C. William-a'n a kaihruai a. BCM kohhran Upa Pc. Lalmawiliana'n hunserh hmangin, PZP General Secretary Pu Vanbiakliana'n report a pe a. Sr Adviser Pu C. Zobuailiana kaihhruaiin sunna hun hman niin, Asst General Secretary Pu Lalhmangaihzuala'n martarte chanchin a chhiar chhuak a, Treasurer Pu Lalthazuala'n lawm thu a sawi thung. He hunah hian PZP President Pu Herbert Ramengmawia leh MNF General Secretary i/c Martar Family & Rehabilitation Pu R. Lalnunsanga te pawhin thu an sawi bawk.

PZP bul tuma martarte hriat rengna lungphunah hian martar 11 hming a chuang a. A huna report lut hman lo mi dang 5 nen, tuna Pangfa martar hriat theih chin hi 16 an ni a. PZP chuan an la zawn chhunzawm zel dawn tih an sawi.

Lungphun hawnna inkhawm hman zawh hian khawtlang huapin ruai theh nghal a ni.

Hemi ni vek hian Home Minister chuan Vathuampuia YMA Library chu a hawng nghal a. YMA hruaitute nen library tihchangtlun chhoh dan tur an sawi ho bakah, khawtlang hotute'n khawtlang mamawh an lo thlente a ngaihthlaksak a. Saibawh leh Vathuampui inkar kawng chhe lutuk chu a hma lama thawm that a nih theih dan tur sawi ho niin, PWD lam atangin PMGSY leh BDO lam atangin BADP hmang tea siam tha tura hma lak ni se, tih a ni.

Home Minister hian nimin piah tlai khan Lawngtlai Thingkah daia 3rd IR Battalion hmun tur sak mek a tlawh bawk a. Contractor leh thawktu dangte'n lo dawngsawngin, an lo fan kualpui a. Hna thawh chhunzawm zel dan tur te sawi hovin, Home Minister chuan a zawh hun tur July 2019-a zawh hman tum ngei turin a satute chu a chah a ni.