Vawiin hian Lawngtlai DC Conference Hall ah Minister Pu R. Lalzirliana hovin Lawngtlai a District Officer ten meeting an nei a, Lawngtlai District hmasawnna tur thu pawimawh hrang hrangte an sawi ho.

Minister chuan, Officer kalkhawmte chu an thiamna leh finna te, an theihna te, ram leh District hmasawnna atana hmang turin a chah a, kumin kum tawp lamah MDC thlanna te pawh hmachhawn tur kan nih avangin mit tikham zawnga awmlo tur leh thinlung thianghlim tak pua mahni hna thawk theuh turin ka ngen che u a ni, a ti a. Kan ramah dan kengkawhtu tur Department kan nei a, chuti chung chuan Pawl thenkhatten mahni thua thil tih an lo tum ve mai chang a awm thin, chu chuan hnam inpumkhatnate, thawhhona te a tichhe thei thin a ni. Pawl hrang hranga hruaitu pawimawh tak takte hi sawrkar hnathawk an lo ni leh zel a, sawrkar dan hnuaia hnathawk chunga Pawl phen atanga sawrkar kar chin hi a tha lo hle a ni. Chuvang chuan Officer ten chutiang thil tilovin dik takin kan hnaah I rinawm ang u. Kan hnathawh theih chhung hian hriatreng tlak thil tha tih tumin theihtawp chhuah theuh ang u tiin a fuih bawk.

Minister tawiawmtu Pu H. Zothangliana, Parliamentary Secretary, Higher and Technical Education pawhin thusawiin hmasawnna hnathawhnaa Zangnadawmna phut nasat vanga harsatna thleng thin chu pawi a tih thu a sawi a, thinlung thar pua kan inenfiah a tul hle a ni a ti.

He Meeting hi Pu J. Hmingthanmawia, Lawngtlai Bawrhsap in a kaihruaia, Home Minister Pu R. Lalzirliana’n Lawngtlai a rawn tlawh leh Independence Day a hman pui dawn avanga a lawm thu sawiin District Officer te nena inkawmna hun a neihpui thuah pawh a lawm thu a sawi a, rah tha a chhuah ngei a beisei thu a sawi a ni.

He Meeting ah hian District Officer ten harsatna an tawh leh an mamawh thil pawimawhte an thlen hlawm a ni.