Vawiin hian Lawngtlai bul Thingkah khaw kianga 3rd IR Battalion Headquarters sakna tur lung Pu R. Lalzirliana, Home Minister chuan a phum.

Hemi puala inkhawm buatsaihah Pu R. Lalzirliana chuan, chhim lam hi Mizoram chhuahka pawimawh ber la ni mai tur a ni a, tunah pawh kan hmuh angin KMMTTP kawngpuiin Lawngtlai District a paltlang ruah tawh mai a ni. Hei vang hian venhimna lamah pawh hma thar lak ve a ngai a, chuvang chuan sawrkarin Thingkahah Police Battalion hmunpui tur a ruahman ta a ni, a ti. Mizoram Police te hian kawng hrang hrangin vantlang tan hna an thawk ve reng a, chhiattawhna kawng tinrenga chhanchhuahna hnate, ruihhlo leh sualna dang ven kawngahte, kangmei ven leh tuitla zawn kawngah te, bakah English Medium School te hial an din thin a. Chung thilte chu Thingkah leh Lawngtlai khawpui hian nasa takin a la chhawr dawn a, sum leh paiah pawh nasa takin hma a sawn pui dawn ani, a ti. Thingkah khawtlangin Police hmunpui tur phal taka an pe chu lawmthu sawiin khaw entawn tlak tak nia a hriat thu a sawi a ni.

Khualzahawm Lt Col.(Rtd) Z.S Zuala, Parliamentary Secretary, Home Department pawhin thu sawiin, Police hmunpui thar tur sak hnathawh kan tan dawn a, hnathawktuten belhchian ngam leh rin ngama hna an thawh kan duh a, lirnghing leh leimin thinna rama cheng kan nih avangin chung chhiatna thleng thei ang chite laka him thei ang ber zela hna min thawhsak turin kan duh a ni, a ti.

He hunah hian Pu C. Ngunlianchunga, Minister of State, AH & Vety leh LADC CEM aiawhin Pu C. Lalneihkhuma, EM LADC te pawhin thusawina hun an hmang bawk. Inkhawm hi Addl. Secretary, Home Department, Pu Lalbiakzama’n a kaihruai a, hna thawk tura thlan NECS Managing Director Pu C. Nunsanga’n technical report a pe bawk. Ministry of DoNER atanga Rs 2842.28 lakhs senna tur ruahmanna niin tunah hian Central sawrkarin Rs 1023.22 Lakhs a rawn pechhuak tawh a, thla 36 chhunga sak zawh tur niin tunah hian a satu tur Company te hian hmanrua an inlakkhawm ngah tawh thu an sawi a ni.

He inkhawmah hian Parliamentary Secretary Pu H. Zothangliana, IGP Mizoram Pu Zorammawia, IPS, Lawngtlai bawrhsap Pu J. Hmingthanmawia, Lunglei SP Pu Zosangliana, Lawngtlai SP Pu Lalsanglura, Fire & Emergency Director Pu Neihchungnunga te bakah Lawngtlaia atangin Head of Offices te leh LADC a MDC leh Officers te, tlawmngaipawl aiawhte, chanchinbumite leh Thingkah khawtlang mipuite an tel a ni.