Serchhip District Fire Prevention Committee hmalakna in vawiin chawhnu dar 1:00 khan Serchhip Bazar kawn ah “Fire Prevention Week, 2016” (February 10-16) hawnna inkhawm buatsaih a ni a, Serchhip District Bawrhsap Dr. Lalrozama, IAS chuan khuallian niin “Fire Prevention Week, 2016” hi a hawng a ni.

Kangmei Ven Hapta hawngtu District Bawrhsap chuan hawnna thu sawiin mithiamte chhut dan chuan kum 10 kal ta chhung khan Serchhip District chu Mizoram District zawng zawng zinga ram ti kang tlem ber kan nih laiin tun hnai kum hnih/khat chhung bik ah erawh a ti kang nasa ber te zing ami kan ni thung a, ziak leh chhiar thiam tamna ber District ni chung si a ram ti kang nasa ber nih bawk si hi thil inhmeh lo tak a ni a ti a, kangmei tichhuak nasa kan ni hi a tlawm thlak a, kum 10 chhunga kan hmingthatna hi hloh hlen lo tura theihtawp lan chhuah a ngai a ni a t bawk. Serchhip khaw dai National Highway No. 54 hrul a awm Sailiamkawn leh Keitum inkar kum tin kang thin chu an vei thu leh zirchiang tura hma lak anih thu sawiin Bawrhsap chuan a zirchiangtute rawtna siam te pawh Sawrkar hotu liante pawm puina dil mek anih thu a sawi a, New Serchhip a Fire Station awm pawh kumin thal chhung hian Serchhip khaw chhim lam vil tura chhawp hnaih dan tur ngaihtuah mek a ni a ti bawk.

Bawrhsap chuan ram kang veng turin Sawrkarin a tih tur a ti mek a, a ti zui zel dawn bawk a ni a ti a, mipuite leh khawtlang hruaitute pawhin an tih tur leh zawm tur te thuawih taka an tih ve a beisei thu sawiin lo hal hun te, mei kawng sial chungchang leh sawrkar thuchhuah hrang hrangte fimkhur taka zawm tura mipuite ngen in Dan bawhchhia an awm chuan Sawrkarin a tih tur dik tak an chungah a tih ngei ngei tur thu a sawi a, "Sawrkar hi min pui ula, Sawrkarin kan pui bawk che u ang a, kan tanrual tlan pawt chuan kan thuil tumah kan hlawhtling ngei ang" tiin hma lakho puiah mipuite a sawm a ni.

Pu Lalramnghaka Kawlni, Chairman, Joint Village Council, Serchhip Town pawhin thu sawiin mipuiten ram kang laka in veng tura rilru siam thar a pawimawhzia leh Sawrkar hmalakna tha taka thlawp an tum thu a sawi a, thusawitu dang Pu Lalremruata Ralte, Treasurer, MJA, Serchhip District pawhin MJA member te'n theihtawpa Kangmei ven chungchang zirtirna mipui hnena pek an tum thu sawiin kangmei venna atana rawtna an neih thenkhat te a sawilang bawk a ni.

Pu Lallianzuala, DFO, Thenzawl, District Level Fire Prevention Committee a Member Secretary ni bawk chuan Report pe in Kangmei ven kawnga District Level Fire Prevention Committee in ruahmanna a siam te mipui hriatah a puangzar a, Village Council-te hnenah ngenna leh thupek chhuah ani dawn a, ram ti kang lo tura invenna Dan "The Mizoram (Prevention and Control of Fire in the Village Ram) Rules, 2001" zawm tura mipuite hriattirna tihchhuah anih dawn bakah khawtina VC Tlangau leh YMA Information Centre kaltlang a ram tikang lo tura mipuite ngenna siam anih tur thu te, District chhunga Kohhran zawng zawngah Kohhran inkhawma chhiarchhuah turin ngenna siam anih tur thu te sawiin, heng bakah hian Banner leh poster thahnem tak tar ani ang a, Tualchhung chanchinbu leh Cable Network kaltlangin mipuite hnena ngenna siam ani bawk ang. District chhunga Zirna In tinah ram kang ven chungchang inzirtirna hun buatsaih tum a ni bawk. District Bawrhsap in Ram tikang lo tura mipuite hriattirna/khapna (Prohibitory Order) a chhuah ang a, District chhunga ram kang ven kawnga hna thawk tha khua pathum thlan a ni ang a, tualchhung chanchinbute zinga ram kang ven lam hawi zirtirna pe tha pathum leh Cable Network pahnih thlanchhuah a ni bawk ang.

Kumin Ramkang Ven Hapta thupui atan "Ram tikangtu, Ram hmelma" tih chu thlan a ni a, Mascot atan "Khite-a" (Sakhi) hman a ni bawk. Forest Survey of India Report-2013 ah chuan Serchhip District pumpui zau zawng 1421 sq.km.atanga 1224 sq.km (86.14%) lai hi hnim hringin a khuh a, hetih lai hian ngaw dur tha chu 6 sq.km (5% aia tlem) chauh a ni a, ramngaw ti a chhal theih "moderately dense forest" erawh 390 sq.km. (28%) a la awm thung a, a bak zawng chu thlawhbua (open forest) a ni. Tun kum 10 kal ta chhung khan Serchhip District chhunga ram kang hmun 2442 ah a awm bawk.

"Fire Prevention Week, 2016” hawnna inkhawm hi Pu R.L.Chhuanawma, President, Sub-Hqrs YMA, Serchhip in a kaihruai a, Pu Lalduhthlana, DFO, North Vanlaiphai in lawmthu sawiin hnu a khar a, he Week hawnna inkhawmah hian Serchhip khawpuia Sawrkar Department hrang hrang hotute, YMA Branch hrang hrang aiawhte, VC aiawhte leh thuthar thehdarhtute leh zirlaite an tel a ni.