Vawiin chawhma khan ni hnih awh tur Local Level Marketing Workshop on Handicrafts chu Mizoram Apex Handloom & Handicraft Cooperative Society Ltd. (MAHCO) Chairman Pu Zohmangaiha, IRS (Rtd.) chuan I&PR Auditorium-ah a hawng.

Khuallian Pu Zohmangaiha chuan handicraft siamna tur hmanruate chu tualchhunga awlsam taka hmuh mai theih a nih avangin a hmakhua a eng hle a, khawvel ram changkang zawkten an hlut avangin hralh lehna tur pawh hmuh a awlsam hle a ni, a ti. MAHCO tihlenna turin sawrkar laipuiah hma lak mek a nih thu sawiin Pu Zohmangaiha chuan kut themthiamte kut chhuak chu hlawk zawka hralh dan leh state danga emporium-ah te pho chhuah dan ngaihtuah mek a nih thu a sawi bawk.

Khual-zahawm Pu T. Rollee Vareishim-a, Asst. Director (H), Marketing & Service Extension Centre (MSEC), Aizawl chuan sawrkar laipuia Ministry of Textiles thlir danin mi themthiamte hmasawnna chu ram hmasawnna a ni, a ti a. Workshop-a tel zawng zawngte chu a tawp thlenga tel tur leh workshop chu chhawr tangkaia mahni trade-a hma sawn phah nana hmang theuh turin duhsakna a hlan nghal a ni.

Workshop-ah hian Pu R.V. Lalzara (MAHCO) chu resource person niin, ‘Schemes of DC (H) availed by MAHCO in the development of Handicrafts Sector in Mizoram’ chungchang a zirtir a ni.