Home Minister Pu R. Lalzirliana chuan, “Kan ram chhunga Kut hnathawktute thlam leh an thlai chin te tu misual mahin an rawn tichhe tawh tur a ni lova, kan ban pakhat pawh an thiat tawh tur a ni lo,’’ a ti.

Vawiin khan Home Minister chuan tun hnai April 23 atanga Assam Police nia rin ten Buhchangphai ram chhung Cachar ramri depa Leilet ram te an rawn beihna hmun tlawhin he thu hi a sawi a. Pu Zira chuan, Mizoram Police te chu heng leilet thlam pali ngawt ti chhia a, a hnua Buhchangphai YMA ten an sak that leh pawh rawn suasam zui zeltute hi tute nge an nih chiah zawng chhuak ngei turin a hrilh a. Police te chu an huaisenna a taka lantir hun a ni, tiin helai hmuna venhim hna thawktu tur 1st IR Battalion, Mualvum te chu a tul phawt chuan an Silai hmang tangkai tur leh misual dimlo turin a hrilh a ni.

Pu R. Lalzirliana chuan, Buhchangphai rama thlam rawn thiat a, ran leh bungrua te la a thlai tichhetute thiltih dan hi Rukru rual te chetdan dik tak a ni, a tia,tun chinah chuan tu sawrkar leh tu misual mahin an tichhe tawh tur a nilo, a ti. Thangthar zelte tan kan ram kan humhim a ngai a. Keimahni Mizo ngeite pawhin hnamdang ruai ringawt lovin heng leilet ram tehi luahlum in ramri hrulah awm I hreh lovang u, a ti bawk.

April 23 khan helai ramri depa awm Leilet hmuna thlam pali te chu Assam Police nia rin ten beiin Thingzai leh ran vulh lai te an chhuhsak a. April 27 khan thlam ban leh Bawng In te kitin an thiat a, Buhchangphai YMA mi 170 zet nimin April 29 khan thawk chhuakin thlam tehi an sa tha a, amaherawhchu hemi ni vek tlailam khan vengtu Mizoram sipaite kalsawn zauh hlanin misual tehian an rawn thiat leh ta vek a ni.

Nizan dar 11 vel khan 1st IR Battalion Mualvum Commandant Pu C. Lalzahngova chuan vengtu sipai engemawzat tirh thlak belhin tun dinhmunah IR police platoon thum (3) in an thutchilh mek a ni. Vawiin vek khan Home Minister tirhin Kolasib DC leh Addl. SP te chu ramri buai sawi tur hian Buhchangphai atangin Hailakandi an kal ta bawk a ni.

Home Minister chuan thlam neitu neitu mi pahnih ten Thlam pali an sak that leh nan Rs 30,000/ veve leh thlam pakhat sak nan Rangva Bundle 3 zel a pe a. Buhchangphai YMA te thingpui lum nan Rs 10,000/- a pe, Par. Secy Pu K. Lalrinthanga leh Pu Lalrinmawia Ralte, MoS ten YMA tehi tanpuina an peve bawk a ni.

Home Minister hi MoS for Forest Pu Lalrinmawia Ralte, Parliamentary secretary Pu K. Lalrinthanga leh Lt. Col. ZS Zuala leh Pu Zorammawia, IGP ten an tawiawm bawk a ni.