Vawiin khan Home Minister Pu R. Lalzirliana chuan Serlui B. Hydel Project-ah Police Security Barrack cheng nuai 12 senga sak a hawng.

Building thar hi 48 X 16 feet Assam type niin, Main hall bakah Commandar Room leh Kitchen a awm a. Building hi ribbon chep chata hawngin Pu R. Lalzirliana chuan, Mizoram Police ten tangkai taka Barrack chu venhimna hna an thawh kawngah leh tlukluhna hmun tha tak a nih dawn thu a sawi a. Serlui B. Hydel Project chu hun lo la kal zel tur tana mizote tana hmun chhenfakawm tak a nih dawn avangin kawng hrang hrangah thuam chhoh zel a ngai a ni, a ti a. Venhimna lam pawh uluk taka tih a ngaiin sawrkar chuan atul apiang a ti zel dawn a ni, a ti a. Zawhna chhangin Home Minister chuan Police duty te hnathawh dan chu a lungawithlakin tun dinhmunah chuan duty dahbelh tum a ni rih lo a ni, a ti. Hel pawl anga inchhala harsatna siam thinte hi a dan dik takah chuan sawrkar nena Agreement neia awm an ni a, designated Camp-a khawsa tur an ni a. Mipui tana buaina leh harsatna an siam a nih chuan sawrkarin dan angin action ala ang, a ti a ni.

Home Minister hian Police Barrack a hawn hnu hian Serlui B Hydel Project Power House afang kual nghal a. Khawl chi hrang hrang te chu thawktu ten a nihphung leh a awmzia te anlo hrilhfiah a ni.

Serlui ‘B’ Hydel project hi April 2010 atang khan hman tan niin power a pechhuak tawh a, hemi hnu hian harsatana engemaw zat a tawh hnuin kumin February thla atang khan Power pekchhuah tan leh niin vawiin thleng hian hman tangkai ani a, tunlai hian khawl pahnih hmangin Power 8 MW pekchhuah mek ani a, he hydel project-in Power a pekchhuah ang ang hi Kolasib Bawktlang Sub-Station ah lut chho in atul anga Mizoram hmun hrang hrangah sem darh leh thin a ni.

Pu R. Lalzirliana hi Er. CL. Thangliana, E in C, P&E, Pu Madhur Verma,IPS, SP, Kolasib, Pu T. Thangzagin, SE, Project Circle II, Pu H. Lalchhuanliana, Commdt., Ist IR, Mualvum leh midang thahnem takin an tawiawm a ni.