Vawiin khan State Level Committee on Green Mizoram 2012 an Chairman Chief Minister Pu Lal Thanhawla hoin Chief Minister Conference Hall-ah an thukhawm a; kumin 2012 Green Mizoram Day hman dan tur relin kumin kumpuan thupui (Theme) a tan ‘Thingphun ila Zoram nuam i siam ang u’ tih an thlang.

An Committee Chairman Chief Minister Pu Lal Thanhawla chuan kum engemaw chhung chu Mizoramah ‘Green Mizoram Day’ kan hmang ta a; thingtiak pawh kum tinin sang tam tak kan phun thin a. Amaherawh chu lo hal avangte mi kut hlei leh thil hrang hrang avangin beisei angin dam khawchhuak atam thei lo hle a. Chuti chung chuan kan ram hmel ti danglam khawp a mawi hmuh tur a awm tan ta hi thil lawmawm tak a ni a ti a.

Chief Minister chuan kan ram kan te chereu sawt zel chuan tui hna a titlem a, sik leh sa a ti danglamin a tichhe mek bawk a ni. Hengte avang hian a venhim hna hi mipuite mawhphurhna a ni tih hriain tan kan lak theuh a ngai a ni a ti. NLUP hmang a tlangram loneih tihtlem zel tum a ni a, hei hian ramngaw nasa takin kan siam belh theih ngei a beisei awm a ni a ti.

Kumin Green Mizoram Day hi a hawnna Khatla AR Complex ah Ni 14.June.2012 (Ningani) zing dar 8-ah neih a ni ang a. Chief Minister Pu Lal Thanhawla khuallian a ni ang. A hawnna inkhawmah hian ‘Green Green Mizoram’ tih hlathar leh Green Mizoram lam hawi hla engemaw zat sa in Zo Rock leh zaithiam engemaw zatin an awi bawk dawn a ni.

Chhun dar 10:00 atangin Zokhawsang Assam Rifle Complex chhungah thingphun hnatlangpui a awm dawn a ni. Hemi ni vek hian District tina h anmahni District huam chhung theuhah Green Mizoram Day hi hman a ni bawk ang. Mizoram pumah thingtiak 2,86,120 phun tum a ni. Thing tiak hi pangpar mawi chi, a rah sava tlan chi leh mihring ei chi te pawh a tel a ni.

Hriat rengna thingphun duhte tan pawh hemiah hian thingtiak phun theih a ni dawn a ni.