Mimal pahnihin Vaivakawn kawng pengthuam tak kawngpui zauh nana inhmun an pek bawhzuiin helai in ding pahnih te chu tukin khan thiah tan a ni ta.

Hetianga mimal thilphal te thiltih hriatpui hian Speaker Pu R. Romawia, UD &PA Minister Pu Zodintluanga leh Parliamentary Secretary to CM Pu Lal Thanzara te chuan inthiah hnatlang bultan hi tukin zing khan an tawiawm a ni.Vaivakawn kawng pengthuam lai taka inhmun hi kawng zauh nan hun rei tak chhung sorkarin mimal ram neitu Pu R. Vankhuma leh Pu H. Lalengliana te chhungkua hi an lo dawr tawh a. An pu, Lala Vankal, pasaltha, in lam leh ram lama thangchhuah, zawhzazo hnenah khatihlaia Superintendent of Lushai Hills chuan Sairang kawng sial tlang tura a puih lawm thu sawi nan 1929 khan helai ram hi a lo pe a ni. Tukin khan hnatlanga inthiah hi tan nghal a ni a, inthiah zau zawng hi 107.10 square metres vel a ni.

Hnatlang tan hma inkhawm tawite buatsaihah thu sawiin Speaker Pu R. Romawia chuan he ram nei tura sorkarin hma a lak dan te a sawi fiah a, Pu R. Vankhuma leh Pu H. Lalengliana te chhungkaw inpekna lawmawm a tih thu a sawi. He huna thusawi tu dang Parliamentary Secretary Pu Lal Thanzara pawhin Vaivakawn pengthuam lai tak, lirthei leh ke a kal te tana hmun chep tak ni thin tihzauh theih a lo nih dawn takah hian tlawmngaia ram petu te chungah lawmthu a sawi a. Khawpui chhung hmun dangah te pawh hetianga vantlang tana mi inphal hi chhuak zel thei se a duh thu a sawi bawk a ni.