Vawiin chawhma dar 11.00 khan State Disaster Response Force (SDRF) btach 8-na chuan 5th IR Bn Headquarters, Lungverh-ah training kharna inkhawm an nei a; he hun hi Home Minister Pu R. Lalzirliana chuan a hmanpui a, Disaster Management & Rehabilitation (DM &R)Minister Pu Nihar Kanti Chakma chu khual-zahawm a ni.

Home Minister chuan, “Mizoram hi lirnghing na tak kalkawnga awm kan nih avangin chhiatna lian tham lo thleng thei hmachhawn tura lo inralrin hi thil tul tak a ni a. SDRF te tangkaizia leh an thiamnate chu tun hnaia Laipuitlang-a leimin avanga chhiat kan tawhah khan a hmuh theih a ni” a ti a. Mizoram Police battalion tinah SDRF 200-300 tal awm se a duh thu sawiin, “Keini police-te chauh hi hmanlai zawlbuk nun anga englai pawha tlangval rual riak khawm awm chhun kan ni tawh a; chhiatna a lo thlena chhanchhuah hna thawk tura pun kan remchang ber a. Mipuite tana thlamuanpui theih tura englai pawha kan inrin a, mite min beisei anga hna thawk tura kan inpeih a ngai a ni” a ti. Mizoram Police hotute zingah mahni hna thawk tura sipai chhawr thinte chu sawrkarin sim tura a hrilh nawn fo dawn tawh loh thu sawiin, “Thuawi duh miah lote chu sawrkar pawhin a hrem hreh dawn lo tih hi ka sawi nawn duh a. MPS an nih pawhin IPS-a an kaisan theih lohna tura action lak a tul ang. Kum 5 chhungin police-te rilru hnual tawh kan kai harh thar leh a, sawrkar term a tawp dawn hnaih avanga thuawi lohna leh inthlahdahna a awm chuan sawrkar thikthu a chhe hle dawn a ni” Home Minister Pu R. Lalzirliana chuan a ti.

DM&R Minister pu Nihar Kanti Chakma pawhin thu sawiin, “Global warming avanga khawvel ram tinah chhiatna nasa tak a thleng mek zel a; hetiang huna chhanchhuah hna thawk tur leh chhiatna pumpelh dan tur ruahman chu DM&R mawhphurhna a nih rualin, a taka thawktu tur chu vawiina training chhuak SDRF te hi in ni” a ti a. Chhiatna lo thlen hun leh ni tur chu hriat lawk theih a nih loh thu sawiin, “Disaster hian ram hmasawnna a tichhiain, a tithuanawp thei a, in leh lo bakah nunna tam tak chan theihna a nih bawk avangin a pumpelh tura tanlak leh inralrin chu mitin mawhphurhna a ni” Pu NK Chakma chuan a ti bawk.

Vawiina SDRF training chhuakte thlahna inkhawm hi DM&R Principal Secretary Pu PC Lallawmsanga chuan a kaihruai a. He training-ah hian 5th Bn. IR leh Ist Bn. MAP atangin sipai 45 an tel a; National Disaster Response Force (NDRF) 2nd Bn. Kolkata atangin anmahni zirtirtu tur an local a, Mizoram Police atanga Master Trainer 12 ten an pui bawk a ni. Vawiina training zo ta te nen hian Mizoram Police hnuaiah SDRF training chhuah mi 424 an awm tawh a ni. Home Minister hian training chhunga titha zual thlanchhuah mi 3 hnenah certificate a sem a; lawman dawngtute chu :

(i) Const. Lalramhluna Ist Bn MAP (ii) Const. Lalchhuanawma Ist Bn MAP leh (iii) Const. H. Lalnunzira, Ist Bn MAP te an ni.