Vawiin khan Mizoram State Tobacco Control Society, Indian Society on Tobacco & Health (Mizoram Chapter) leh Mizoram State Legal Services Authority te buatsaihin Vanapa Hall-ah dar 11:00 AM atangin World No Tobacco Day (WNTD) hman a ni. He hun hi Pu R.Romawia, Speaker, Mizoram Legislative Assembly-in hmanpuiin Pi Esther Lalruatkimi, Secretary, Health-in inkhawm hi a kaihruai.

Speaker chuan Mizo mipui za zela 65 vaihlo leh a kaihhnawih lakah an fihlim lo chu vanduai thlak a tih thu sawiin Chief Minister hova Mizoram Smoke Free Group-te din ani chu lawmawm a tih thu a sawi a. Pu Romawia chuan Anti-Tobacco Squad hnathawh chu fakawm a tiin an hnathawh rah langsar zual tunah hian kan seng mek chu vantlang mipui punkhawmna hmunahte mei zu khu luai luai hmuh tur an vang ta hi a ni a ti. Speaker chuan thalai kalkhawmte chu hrisel an duha damrei an duha mahni intodelh an duha thluak tha neih an duh chuan vaihlo leh a kaihhnawih laka fihlim tum tlat turin a chah. Khuallian chuan Vaihlo siam chhuaktuten vaihlo fakmawina an tarlang thin chu dan kalh a nih thu leh hemi khapna atana Sorkar laipui hmalaknate a sawi a, Mizoram chu vaihlo hman kawnga kan san ziate leh hemi kaihhnawih natna vei kawnga India ramah ber kan nih dante a tarlang bawk a ni. Mizote hi hnam hrisel zawk kan nih theih nan vaihlo hmang lo tura inzirtir hi mitinte mawhphurhna a nih thu sawiin, vaihlo nun suattu dona kawnga tan la theuh turin mipuite a fuih a ni.

Pi Esther Lalruatkimi chuan WNTD hi kumtina hman anih thin leh thupui thlan bik nena he hun hi hman thin anih bakah vaihlo do hi mitinte mawhphurhna anih thu kalkhawmte a sawi a.

Khawvel pumah vaihlo hian mihring nun a suat nasa em em a, Second 7 danah mi pakhat zel nunna la anga chhut niin vaihlo vanga thihna hi thihna pumpelh theih si-ah chuan thihna thlen hnem bertu-a ngaih a ni a, khawvel puma kumtling mi sawm zela pakhat hi vaihlo vanga thi anga chhut anni bawk. Heti khawpa chhiatna leh thihna thlen nasatu anih hriain World Health Organization chuan 31st May hi World No Tobacco Day-ah puangin kumtin khawvel pumah he ni hi vaihlo dona leh a that loh zia inzirtirna ni atan an hmang thin a ni.

Mizoram ah pawh WNTD hi Indian Society on Tobacco & Health (Mizoram Chapter)-te hmalaknain kum 1989 atang khan hman tan ani a. ISTH(M) President, Pi Lal Riliani kaihhruaina hnuaiah vawiin ni thlengin he ni hi tangkai thei ang bera hman thin a ni. World No Tobacco Day atan hian kumtin thupui thlan bik neih thin a ni a, kumin atan “Ban tobacco advertising, promotion and sponsorship” tih thupuiah hman a ni. Dr. Jane R. Ralte, State Nodal Officer-cum-Project Officer, Mizoram State Tobacco Control Society chuan Vaihlo industry hrang hrangte chuan vaihlo hmang mektute hi vaihlo kaihhnawih natna hrang hrang avangin an boral thuai dawn a ni tih hre reng chungin an theih tawpin naupang leh thalai zawkte leh vaihlo la hmang lote vaihlo hmantir hi an tum ber a ni a, hemi atan hian mipui ten an it theih tur ang bera vaihlo leh a kaihhnawih fakmawina chhawp chhuahsak hi an hnapui ber a ni ati. Hemi anih avang hian vaihlo fakmawina khap hian India mite vaihlo hman kawngah nasa takin a veng thei a ni tih hriain, Sorkar laipui chuan kum 2003 khan COTPA dan a lo siam chhuak ani. He dan hnuaiah hian Section – 5 chuan vaihlo leh a kaihhnawih hrang hrang fakmawia khap a, he dan bawhchhia chu Section – 22 na hmangin Kum -5 thleng lungin tan tir a Rs. 5000/- thleng chawitir theih anni.

World No Tobacco Day hi District hrang hrangah hmanna hun hi neih a ni.Lunglei-a hmanna pui ber chu Saikuti Hall-ah neih niin Pu Joseph Lalhimpuia, Chairman, Lunglei High Power Committee chu khuallian a ni a, Pu Sapchhunga, Deputy Commissioner, Lunglei-in a kaihruai a ni. He hunah hian School hrang hrang naupangte bakah sorkar official hrang hrangten an hmanpui bawk. Lunglei-a World No Tobacco Day hman hi Lunglei District Anti-Tobacco Squad huaihawta hman a ni a, he programme hmanna tur hian DRDA chuan sum thahnem tawk tak an tum bawk.

Lawngtlai District ah pawh Lawngtlai District Anti-Tobacco Squad huaihawtin Deputy Commissioner Conference Hall ah hun hman a ni a, DC-in a hmanpui bawk. Champhai ah chuan Anti-Tobacco Squad leh DC-te buatsaihin G.M Higher Secondary School ah DC ho in hun hman a ni a, school hrang hrang bakah sorkar hnathawk hrang hrangten an hmanpui bawk.

Mamit ah chuan he hun hi District Legal Services Authority, Mamit leh Mamit District Anti-Tobacco Squad -te huaihawtin Govt. Higher Secondary School, Mamit-ah hman a ni a, Pu R.S Lalzamliana Addl DC, Mamit chuan he hun hi a hmanpui a ni.

Serchhip-ah pawh Pi Juhi Mukherjee, Deputy Commissioner, Serchhip District huaihawtin school naupang leh Anti-Tobacco Squad member hote nen he hun hi BNRGSK Hall, Serchhip-ah hman a ni a, quiz competition te buatsaihin lawmman zawng zawng pawh DC hian a tum vek a ni.

World No Tobacco Day programme zawh hian he ni denchhen hian Pi Juhi Mukherjee, DC ho in Serchhip khawchhungah Anti-Tobacco Squad Drive an nei zui a ni. World No Tobacco Day hi District hrang hrangah hman a niin Secretary, School Education leh Higher & Technical Education in thuchhuah a siam angin zirna in hrang hrangten kumin World No Tobacco Theme bakah thutiam sawirualna neiin hun hman a ni. Hemi bakah hian Chief Secretary in Sawrkar department Secretary leh DC zawng zawngte a ngen angin he ni hi ngaih pawimawh a ni a, department hrang hrangten he ni hi an hmang tha hle a ni.