Khawvel pum huap a Zuk leh Hmuam Dona Ni “World No Tobacco Day” chu vawiin khan Serchhip ah hman a ni a, chawhma dar 9:30 ah BNRGSK Hall, P&E Vwng, Serchhip ah he ni puala inkhawmna hun urhsun taka hman a ni a, hemi hnu hian Serchhip District Anti-Tobacco Squad ten an hotu District Bawrhsap Pi Juhi Mukherjee, IAS hovin zuk leh hmuam chungchanga sawrkar dan siam zawm lo tu te vaiin beihpui (special drive) an thlak nghal a ni.

Vawiin chawhma BNRGSK Hall a Zuk leh Hmuam Dona Ni puala inkhawm ah hian zirlai naupangte nen hun hman ho a ni a, fuihna thu sawitu District Bawrhsap Pi Juhi Mukherjee, IAS chuan zirlaite chu zuk leh hmuam laka fihlim tura chahin, Cigarette leh Vaihlo Company hrang hrangte hian an target ber pakhat chu tleirawl rual, nunkawng rahbi thar rap tura ke pen mek te hi an nih thu a sawi a, vaihlo in an tana tha thil pakhatmah a thlen loh avangin inthiarfihlim a pawimawh ber a ni a ti a, mizo thalai infiammi tam tak zuk leh hmuam a fihlim loh vanga an nih tur ang ni pha ta lo an tam ni a a hriat thu sawiin pawi a tih thu a sawi bawk a ni. Bawrhsap hian thu a sawi zawh hian zirlaite hnenah “World No Tobacco Day” kaihhnawih zawhna chi hrang hrang a zawt a, a chhang dik te hnenah lawmman ama senso atanga siamin a pe nghal zel a ni.

Thusawitu dang Pu Laldawngliana, Chief Medical Officer, Serchhip District pawhin zirlaite chu vaihlo in an taksa a nghawng theih dan chipchiar takin zirtirna a pe a, Pu Zolawma, District Education Officer pawhin zirlaite hnenah thuchah pawimawh tak tak sawiin World No Tobacco Day puala thutiam sawi rualna hun a kaihruai nghal bawk a ni.

Vawiin World No Tobacco Day puala inkhawmah hian Government High School, Serchhip leh Marian High School zirlaite an kalkhawm a, zirlaite bakah, zirtirtu, sorkar official leh thuthar lakhawmtu ten zuk leh hmuam do turin thu an tiam thar leh a, inkhawm hi Pu Andrew H Lalremruata, DIPRO in lawmthu sawiin hnu a khar a ni.

Inkhawm zawh veleh hian District Bawrhsap Pi Juhi Mukherjee, IAS hovin Serchhip District Anti-Tobacco Squad te chuan hmun hnih a in thenin, Serchhip Bazar leh Sawrkar Pisa hrang hrang fang kualin zuk leh hmuam do beihpui an thlak a, dan bawhchhia mi 18 an man a, an mi man te hi pawisa chawi tir zel an nih bakah challan an issue nghal zel a, dawrkai hrang hrangte pawh an thil zawrh te endik sakin, dan in a phal loh anga cigarette zuar te pawh pawisa chawi tir an nih bakah an thil zawrh te an man sak bawk a ni.

World No Tobacco Day hi Serchhip District pumpuiah hman a ni a, chanchinbu ah Zuk leh Hmuam that lohzia tarlanna Article te tihchhuah a ni a, District chhung a Sawrkar Pisa leh Zirna In zawng zawngah World No Tobacco Day puala Vaihlo do tura intiamna (Pledge) chu chham rual tura thawn chhuah vek niin intiamtharna hun hman a ni bawk.

Kumin a World No Tobacco day thupui chu “Ban tobacco advertising, promotion and sponsorship” a ni.