Home Minister Pu R. Lalzirliana chuan tunhnaiah Chiahpuam avanga hlawkna lo tel Kohhran te sorkar in thinglet tura sawi a ni fo a, mahse chutiang ni lovin Kohhran hi kan zah em em a, Chiahpuam hlawkna lo teltu te pawn sorkar in thinlet a tum hauh lova, amaherawhchu pek let nachang an hre turah kan ngai thung a ti. He thu hi vawiina Serchhip YMA Sub-Hqrs Serchhip Conference vawi 1-na, Town Hall-a a hmanpuina ah sawiin Pu Zira chuan Pawl hrang hrang leh Kohhran hruaitu te zingah mahni nihna kawr a hmanga mimal hamthatna um an pung zel tih sawiin YMA member te chu hetiang therhlo lakah hian kan inthiarfihlim tur a ni a, hruaitu te pawhin hotu emaw kan in ti tlat tur a ni hek lo a ni a ti
A sawizelna ah Khuallian Pu Zira chuan Politics atang te in ram siamthat kan tum thin a, mahse ram kan siamthat tumdan te hi a lai tawk lo fo thin a, kalsual pawl a awl a, reilote ah mipui tan ninawm leh chimawm mai kan chang leh fo thin a, YMA erawh chu chutiang ni ve lovin Mizo hnam pumpui tana thawktu a ni a, thleibik a nei lova, Party a thliar hek lova, chuvang chuan YMA hi Mizo hnam nun siamthat nan nasa takin kan hmang thei a ni, a ti. A sawizelna ah Pu Zira chuan Thalai te hi kawng kan kenthiam telh telh a hun tawh a, Kohhran ah pawh, tlawmngai pawl hruaina hna ah leh ram rorelna thlenga kawng kan ken thiam tial tial a ngai a, chu chu kan Khawvel kalphung inher danglam mekin a hrinchhuah a ni a ti. Sub-Hqrs. YMA thurel zinga Dist. Jail hawn chungchang pawh sawiiangin Pu Zira chuan tun dinhmunah chuan Lunglei leh Aizawl a Dist. Jail pawh a enkawltu an indaih lo em em a, chutihlaia a thar hawn thuai chu sorkar tan pawh phurrit nasa tak a ni dawn tih sawiin hmanhmawh theih a ni dawn lo tih a sawi a, mahni thurel tihhlawhtlin nana Total Bandh ang chi siam te phei chu YMA tih ngai loh thil a ni tih a sawi bawk.
