Kar kalta Inrinni 3-Oct-2015 khan Saitual Higher Secondary School compound a Tribal Girls’ Hostel sak chu bialtu MLA leh Home Minister R.Lalzirliana’n a hawng, NECS leh Social Welfare Deptt ten Memorandum of Understanding an ziah anga sak Tribal Girls’ Hostel hi Rs 359.36 lakhs senga NECS in a sak a ni.

Home Minister Pu R.Lalzirliana chuan Tribal Girls’ Hostel building tha tak Saitual Higher Secondary School ah sak puitling a lo ni ta chu lawmawm a tih thusawiin tangkai taka hman anih tur thu a sawi a, NECS in tribal girls’ hostel a sak tam tak zinga Saitual a tel ve chu law awm a tih thu leh Mizoram tana NECS hnathawh chu fakawm a tih thu a sawi. Pu R.Lalzirliana chuan Mizote hian kan zia kan thlak zung zung a, chuvang chuan rilru ngelnghet tak hi kawng tam takah kan nei lo fo thin hi kan insiam that a ngai hle a ni, a ti.

Tribal Girls’ Hostel hi chhawng 3 niin 1309sq metres zet a zau a ni a, lirnghing laka a him theih nan Earthquake resistant structure-a design a ni. Tanky lian, Stairecase 2, PVC Tank, Pump House, solar water heating system te nen thuam a ni a. Kawt zawl zau tak leh Approach Road bakah compound fencing pawh tih vek bawk a ni. He hostel hi NECS in Tribal Girls’ Hostel sawmpanga (15) Rs 5016.76 lakhs senga a sak zinga mi a ni a, hostel sak senso hi 100% in Ministry of Tribal Affairs in a tum a ni. He hunah hian Pu Lalnunzira Miller, Principal chuan School Education Department aiawh in thusawina hun a nei a, Pi Vanladini, Director, Social Welfare Department in kalkhawmte hnenah lawmthu sawiin hun hnung a khar a ni.

Tribal Girls’ Hostel hawnna function hi Social Welfare Department Secretary Pu Lalthangpuia Sailo IAS chuan a kaihruai a, Pu Robert Romawia Royte, CMD, NECS in report a pe bawk. Tribal Girls’ Hostel hawnna ah hian khawtlang hruaitu leh pawl hrang hrang, school naupang bakah mi pawimawh tak tak tha hnem tak an tel a ni. He Saitual Tribal Girls’ Hostel building hi June ni 2, 2012 khan Chief Minister Pu Lal Thanhawla’n a lungphum a lo phum tawh a ni.