Hnam Chhantu Pawl in Handloom & Handicraft Exhibition Vanapa Hall kawta an buatsaih chu Trade & Commerce Minister Pu H. Rohluna’n vawiin khan a hawng.

Kan ram chhung thing leh mau leh remchang dangte hmang tangkaia Mizo kutchhuak ngei hmanrua leh bungrua tha leh tangkai tak tak te pholanga, mamawh te tana lei mai tura chhawpchhuah a ni chu a lawmawm in chhuanawm a tih thu Khuallian Pu Rohluna chuan sawiin hemi kawnga hmala tu leh thawktu te inpekna ah a fak.

Mizo te hi mi themthiam leh rilru chak kan nih avangin thiamthil dehchhuah kawng hrang hrang ah Hnam Chhantu Pawla in nghat mai lovin, hetiang kut themthiamna ah hian eizawnna tha tak a awm a ni tih hria a, in chherchhuah theih anih thu sawiin Pu Rohluna chuan vawi khata hlawk nghal mai duhna hi rilru ah awm lo se, a tha tur leh hlawk tur ngaihtuah thiam in a daih rei tur min dawrtu tur te duhzawng leh mamawh te ngaihtuah tel a ngaih thu te, State thenawmte hmasawnna umpha ve zel in a thawktute tana hlawkna te belhchhaha sum leh pai chang thei turin Hnam Chhantu Pawl hmalakna puibawm in, keimahni ngei kut kawih in ngaihhlut sak a tul thu a sawi.

Vawiin atanga ni thum chhung awh tur Exhibition hawnna ah hian Khual zahawm Pi Rualkhumi, Director, KVIC pawhin thu sawiin kut themthiamna hrang hranga Mizo ten eizawnna hlawhtling tak tak an neih chhoh dan te, bul tan tir te tan pawh thahnem ngai leh tihtak zeta thawktu te tana tanpuina loan Sorkar in a pek thin dan te a sawi bawk.

Exhibition buatsaihtu leh Hnam Chhantu Pawl hotu leh khaipa ber Pu Ramhmangaiha chuan Zoram intodelh chu an thupui ber a niin thing leh mau, changel leh ram hnim hrang hrang leh hmutphhiah te chu eizawnna tangkaia siam tura a lo beih dan leh hmalak chhoh dan a sawi a ni.

Hnam Chhantu Pawl hi a tir ah chuan Firms & Society hnuai ah in ziak lut in Non governmental Organisation a ni a. India ram leh ram pawn China, South America, Malaysia, Singapore leh Indonesia leh England ah te an thil siam hi hlawhtling tak in an lo pho chhuak tawh thin. Tunah hian hnathawktu Regular 20 leh puitu 50 chuang an awm a, mi tam tak in eizawnnan an hmang mek. Upper Republic a Pu C. Pahlira building ah office an nei a ni.

Tun tum Exhibition ah hian thilsiam chi hrang 40 chuang zet pho chhuah a ni a, heng zingah hian mau hmanga belthleng (bowl) siamchhuah thar te, thing leh hruihnang hmanga Sofa siam chu mite hip tu leh hmuhnuam tih ber an ni.