Khawvel hmun dangte rualin vawiin khan Aizawl, Mizoram-ah pawh ‘World Heart Day’ hman a ni a, Aizawl Chhinga Veng Community Hall-ah Home Minister Pu R.Lalzirliana hovin he Ni puala inkhawm leh NCD Screening Camp neih a ni.
World Heart Day & NCD Screening Camp inkhawm Dr.Jeremy L. Pachuau, Medical Oncologist, MSCI, Zemabawk kaihhruaiah Khuallian Pu R.Lalzirliana chuan Mizote chu hrisel lam ngaihthah tak, taksa sawizawi lam uar lo leh ei-in lamah pawh insum tawk loh avangin India ramah pawh cancer vei tam lamah pakhatna ni hial a, herat attck leh stroke te pawh an tam ta em em a ni, a ti a. Mipuite hriselna chu sorkar pawhin a vei em em a, sports lamah tan a la nasa a; Health Department pawhin theihtawpin hriselna chungchang inzirtirna te, free clinic te a huaihawt thin a; NEDP hmang pawhin damdawi in hrang hrangte pawh tihchangtlun chhoh zel a nih chu a lawmawm hle a ni, a ti bawk. Hriselna lama sorkar hmalakna Universal Screening Programme, kum 30 chin chunglam zawng zawng tana BP, zunthlum, ka chhung cancer leh chhulhmawr cancer check vek tura hma lak chho mek chu mipuiten theihtawpa tawiawm a inentir ngei ngei turin a chah a. Natna inkaichhawn theih loh Non Communicable Diseases (NCD) - cancer, heart attack, stroke, zunthlum - te hi natna hlauhawm tak tak ni mahse nun dan thlak danglam chuan ven theih an tih hriat a pawimawh a; kan dam loh hnuah chauh exercise lak te, ei leh in hrisel te, meizuk loh te ngaih pawimawh thar lovin a hma atanga kan inven lawk a pawimawh a ni, a ti. Mizo ram leh hnam hrisel tur chuan chhungkua atangin tan a ngai a; vantlang hruaitute pawhin mipuite an hrisel zawk theih nan ke-a kal tha te, upa deuh ke-a kal duh tan pawh chawlh hahdam lawkna tur hmun siam te ngai pawimawh thar turin a chah bawk.
Dr. Loncy V. Lalzarliana, Cardiologist, Aizawl Civil Hospital chuan lung lam natna leh inven dan chungchang zirtirna hun a hmang a; Dr.Eric Zomawia, SNO(NCD), NPCDCS chuan natna inkaichhawn theih lo NCD chungchang presentation a nei bawk a; Chhinga Veng Local Council Member Upa V.L.Thlamuana-in lawmthu sawina hun hmangin hun a khar a ni.
kum 1946-a din World Heart Federation chuan kum 200 atang khan khawvel ram zawngzawnga mihring chengte hnenah Non Communicable Diseases (cancer, heart attack, etc) chungchang zau taka inzirtir a nih theih nan kum 200 atang khan kum tin September ni 29-ah ‘World Heart Day’ a hmang thin a. NCD te hi natna inkaichhawn theih loh ni mahse mi nunna suattu lian ber an ni tawh a, kum tin NCD vanga thi hi mi maktaduai 17.5 an tling hial a ni.
