SCERT Science Promotion Wing buatsaih - State Level Students Science Seminar 37-na chu vawiin khan Chanmari YMA Hall-ah neih niin, seminar hawnna inkhawmah hian School Education Minister Pu H. Roluna chuan a khuallian a ni. He seminar-ah hian zirlai 13 ten “Swachh Bharat: Role of Science & Technology Promises and Challenges" tih thupui hmangin an in el a ni.

School Education Minister chuan kumtin Science Seminar buatsaih theih a ni chu lawmawm a tih thu leh, science lamah Mizoram tan hmasawnna a thlen ngei a beisei thu a sawi a. Mizo te chu hnam naupang te kan nih avangin ram hruaitu hmasa leh mi thahnemngai ten science leh mathematics lamah state dangte rualpha thei turin kawng hrang hranga hma an lo lak tawhna chu vawiin amite hian a rah tha kan seng chho mek a; Minister chuan ramin hma kan sawn chhoh takah chuan zofate ngeiin mahni ramchhung hmasawn nan hna kan thawk thei ta a ni, tiin ram neitu ngeiin hna an thawhloh chuan hmasawnna a kal chak theih loh thu a sawi. Zirlai kalkhawmte hnenah School Education Minister chuan mithiam hmasa ten hma an lo lakna te chu chhawmnung zel tura a duh thu sawiin, anni angin thil hmuhchhuak a hmalakna hrang hrang la ve thei anni tih hre reng turin a chah a. Zirtirtute kaihhruaina zawm a, nu leh pa te thu awih turin leh ram leh hnam tana mi tangkai tak an nih ngei theih nan thahnemngai taka zir turin a chah bawk.

Science Seminar hawnna inkhawm hi Pi Laldawngliani Chawngthu, SCERT Director chuan kaihruaiin, Pi D.Ramdinthangi, Jt. Director, SCERT hnen atanga report tawi ngaihthlak a ni.

State Level Science Seminar-ah hian District tina District Level Students Science Seminar lo neih tawha titha thlan chhuahte an tel a; kum dang a lo tih thin tawh angin seminar-a titha ber hi National Science Seminar, November thlaa Nehru Science Centre, Kolkata-a neih turah Mizoram aiawhin a kal dawn a. Kum hmasa lam intihsiaknaah Mizoram aiawh ten National Level-ah hian lawmman pahnihna vawi hnih an lo la tawh a ni. Science Seminar hi National Council of Science Museum, Govt. of India leh Birla Industrial Technological Museum, Kolkata tangkawpin a bultum a ni.

Vawiin Seminar intihsiaknaa lawmman dawngtute chu hengte hi an ni:

Pakhatna -  Miranda Vytuchho, Class X, Grace Academy, Siaha

Pahnihna - Chiinneihkim Khongsai, Cl X, Hill Gate School, Siaha

Pathumna - Laldinmawia Chawngthu, Class IX, St.Pauls Higher Secondary  School