Set Free Ministries (SFM), India ten Central Jail, Aizawl-ah  ‘Graduation Day’ an buatsaih chu vawiin khan Home Minister Pu R.Lalzirliana chuan hmanpuiin jail tang Bible Course zirchhuak mi 28 hnenah ‘Degree Certificate’ a hlan.

‘Graduation Day’ inkhawm SFM Board Chairman Commr. Lalkiamlova kaihhruaiah Khuallian Pu R.Lalzirliana chuan Set Free Ministries ten jail-ah thahnemngai takin rawngbawna an neih thin chu a lawmawm takzet a ni, a ti a. Vawiina SFM Bible Course zir zo Certificate dawng zawng zawngte chuan Pathian Thu anga an nun hmang chho zel tura chahin Pu Zira chuan jail atanga an chhuah hunah pawh an Pathian Thu zir chuan a tanpui ngei ang, a ti. Jail tan hi hremna angah chauh ngai lovin insiamthatna hun tha an nei zawk a ni tih hre reng a, nundan pangngaia an nun zawk theihna tura dah an ni zawk a ni a; jail-a an awmchhungin an thlarau nun thlenga rawn ngaihsaktu an nei hi an vanneihzia hre turin a hrilh bawk. Pathian hnam thlan pawh inti mahila, fel lo taka kan ti a, sual kan hawisan duh chuan loh chuan Pathianin a hawisan/hrem thin tih Israel fate chanchin atangin a lang chiang hle a, chu chu mimal nunah pawh a thleng dik thin a ni, a ti. Chuvangin jail an tang chhungin mahni insiamthat a, nunphung pangngai taka nung leh thei turin leh khawtlang leh ram tan mi tangkai an chho zel theihna turin duhsakna a hlan a ni.

Set Free Ministries hi USA rama jail tangte zingah rawngbawlna lian tak nei an ni a, he Kristian pawl hian India ramchhung jail hrang hrangah te pawh rawngbawlna neihin Mizoram-ah pawh Central Jail, Aizawl leh District Jail zawng zawngah rawngbawlna an kalpui mek a ni. Vawiin SFM ‘Graduation Day’ hmasa berah hian SFM Mizoram Director Rev.K.Lalzuala chuan ‘Conferment of Degree’ hun a kaihruai a; MZU Vice Chancellor kalchhuak ta Prof.Upa Lianzela’n lawmthu a sawia,Rev TC Laltlawmlova Adviser SSM in malsawm tawngtaina in hun a khar a ni.