Vawiin chawhma khan Mizoram Youth Commission(MYC) Training Hall- ah Home Minister Pu R.Lalzirliana chuan SSC Coaching leh NERLP Training a hawng a. SSC Coaching hi Staff Selection Commission(SSC) hnuaia hna zawng tute tana buatsaih MYC in a buatsaih a ni a, NERLP bul tuma Aviation training MYC in a kalpui tur hi Aviation sector - Airlines Industries kaihhnawiha hna hrang hrang Hostess, cabin crew leh adang te thawh theihna tur skill training a ni thung.

Coaching leh traning programme hawngtu, Home Minister Pu R.Lalzirliana chuan Mizo thalai tam tak, thiamna pe a hlawhsang taka India ram chhung leh pawnlam thlenga hna hmuhsaktu MYC hnathawh chu Mizo hnam tan malsawmna a ni a ti a. "Hnathawk tha leh fak tlak te chawimawi harsat si, midang te chet chhiatna sawi awlsam leh nun thlak danglam hun a. Hnathawk tha leh michhuanawm te hian kan chawimawi an phu a ni. Kan state zim te hi a zau zawngin a thanbelh dawn lova, mipui erawh kan pun zel si avangin kan eizawnna bial te pawh kan zauh ve zel a ngai a. Kan thalai te tan Mizoram pawn leh khawvel hmun hrang hrangah eizawnga hna an thawh theihna tura hmangchang leh thiam thil zirtirna buatsaih hi sawrkarin a ngai pawimawh tak zet a ni', a ti. Traning tur te chu fuihin - Mizoram khawpui hrang hrangah thalai tam tak, mut hun leh thawh hun pawh hre lo, midang te zahna pawh nei lemlo,nu leh pa thawhchhuahsa ringa chapo taka kawhmawh bawl tam tak an awm mek laia chhungkaw tana thawk chhuaktura Mizo thalai fel tak tak engemaw zat tumruhna hmel nen an rawn pen chhuak chu hmuhnuam a tih thu a sawi a. Khawvel thang zelah midang te ruala hmasawnve duh tan chuan thliarkar rilru leh interek duhna thinlung leh thil atthlak kalsan a hun tih sawiin " India ram chhunga awm kan ni a, Mizoram in pelh khan inthlahrung reng reng lovin tawngdang te thiam belh ula, mi dang te aia thiam zawk nih tumna nen a tlangnel ber in zu ni zawk zel tur a ni", a ti a.Hnamdang te thawh ang thawh theih, an thiam ang thiam ve leh an aia theihna sang zawk neih chu ram leh hnam humhalhna atana tangkai a ni tih a tarlang a. Hnam ziarang leh nihphung erawh chiang taka hre tlat turin training tur te chu a fuih a. Nupui leh pasal atan ngat phei chuan hnamdang te nei hauh lo tura chah in "Pu Rokunga hla a kan hmuh ang khan hnamdang te chu thian a siam a tawk chiah tih in theihnghilh ngai hauh lo dawn nia" ti in a fuih a ni.

MYC hmalakna hnuaia hlawhtlinna te tarlangin Pu T.Sangkunga, MLA, Chairman, MYC chuan Mizo thalai sang tam tak chu Sawrkar hmalakna hnuaia traning te neihpui an nih hnuin India ram chhung leh pawnah hna an thawk tawh tih a sawi a. MYC hnuaia training kalpui tawh te chu Mizoram sawrkar sum ti hek lova kalpui a ni tih a sawi a. Zirlaite senso leh zirtirna senso chu Central Sawrkar hnuaia Skill Development scheme hrang hrang te Mizoram sawrkarin a haichhuah atanga tum sak an ni a ti. MYC hnuaia training tawh zinga a tam zawk te chu an training chhuah hma atanga hna hmuhsak leh company atanga sawmna dawng te an nih thu sawiin hlawhtam zawkna India ram pawnlam hna nena inmil training thar te Sawrkar hmalakna hnuaiah MYC chuan a tinzawn leh mek a ni a ti a. Passport erawh ram pawna hnathawh duh tan lehkha pawimawh ber a nih avangin Aizawl passport office ah awlsam taka lo siam erawh a pawimawh thu a sawi. Army Recruiting Office nena an thawhna hnuaia sipai tang duh te zitirna leh kaihhruaina MYC in a pek chuan rah tha chhuahin Sipai rawngrut hnuhnung berah khan tunhnai kum engemaw zat liamta a tumkhata Mizo thalaite sipai a lak tam ber tum a thleng tih tarlangin candidates 4000 chuang atanga mi 145 sipai a lak an nih thu a sawi a. MYC chuan Mizo thalaite thiamthil kawhhmuh turin zirtirtu thiam ber ber rawih zel a tum tih sawiin Mizo thlalai hnazawng tam zawk ten MYC thuchhuah te lo bengkhawn zel turin a chah.

SSC Coaching &NERLP training hawnna inkhawm hi Pu Nghaklianmawia, Member, MYC in a kaihruaia. Pu Lalsawmzuala, US, MYC in Training leh Coaching kalpui dantur te sawifiah in Pu Reuben Ranglong, District Project Manager, NERLP pawhin NERLP leh MYC thawhona leh fuihna thu a sawi a. Vawiin atanga training tan tur SSC Coaching hi batch 4-na niin zirlai 150 tan seat siam a ni a, NERLP leh MYC thawhhona hnauai Aviation Training hi batch 1-na niin zirlai 100 tan seat siam a ni thung. SCC coaching hi thla 4 awh niin Aviation traning hi thla 6 chhung a ni thung.