Food, Civil Supplies & Consumer Affairs Minister Pu John Rotluangliana hovin a pisaah vawiin khan Krismas lo thleng mai turah mipuiin eirawngbawlna gas harsatna an tawh loh nan hma lak dan sawiho a ni a. He thutkhawmah hian Parliamentary Secretary Pu TT. Zothansanga a tel bawk.

FCS&CA Minister chuan kan hma lawk a hunpui lo thleng tur thlir ran in Mizoram Sorkar chuan Indian Oil Corporation Limited (IOCL) lamah tun thla chhunga LPG supply chu titam tura lehkha a thawn thu leh, IOCL lam pawhin tihlawhtlinsak an tum thu an hriattir tawh a ni, a ti a. LPG Distributor te chu LPG mamawh belh tur milin order leh deposit siam pawh an bawhzui nghal turin a hrilh bawk.

Vawiin thutkhawmah hian October thla laihawla IOCL hotute nena Mizoramah LPG buk dik leh mipui khamkhawp Supply tura hmalak ho dan an lo sawiho hnu a thla tin LPG Supply dinhmun thlir ho a ni bawk a. LPG Distributor ten LPG cylinder phut turin an lirthei an tirh bakah Sorkar hminga tlan tir an awm tak avangin LPG dinhmun pawhin ziaawm lam a pan zel thu tarlan a ni. November thla khan Mualkhang Bottling Plant leh Borkhola Bottling Plant atanga mipui hnena pek chhuah leh te chu a vaiin 1,56,949 a ni a. December thla chhung hian vawiin thlengin Bottling Plant pahnih atang hian LPG cylinder 23,433 a lo thleng tawh bawk. Meeting hian Refill Booking System kalpui tura inpuahchahna kal zelah mipuiiah inhrilhhriatna tha tak neih a pawimawh zia tarlan niin, chumi kawnga hmalak dan tur te, consumer leh distributor-te tan remchan zawkna siam a nih theih nan area demarcation siam chungchang te sawiho a ni bawk.