Vawiin chawhma khan Vanapa Hall-ah Regional Sales of Articles of Rural Artisans Society (SARAS) Fair 2016 hawnna puala inkhawm leh Self Help Groups (SHGs) titha te chawimawina hun chu Home Minister Pu R.Lalzirliana, Rural Development Department enkawltu hova neih a ni a. Hemi hnu hian Regional Saras Fair 2016-a dawr te chu Directorate of Transport New Building, Temple Square ah RD Minister chuan mipui tlawhpawh leh dawr theih turin a hawng.

Home Minister Pu R.Lalzirliana chuan SHG te kutchhuak zawrhna dawrpui hawn a ni leh ta chu lawmawm a tih thu sawiin Mizoram atanga SHGs dawr hawngtute chu nikum lama a lo chah tawh anga an mahni kutchhuak leh zawrhlai te an zawrh tawh a beisei thu a sawi a. SHGs Mizoramah tharthawh leh a ni chu lawmawm a tih thu sawiin mahni intodelh pawimawhzia inkawhhmuhna atana hmanraw pawimawh tak a nih a beisei thu sawiin mipui ten Regional Saras Fair 2016 chu hlutsak thei ngei se a duhthu a tarlang. Tunhma a Mizo mipui rilru nia lang - 'hnathawh tumna nei silova hnamdangte tawngpawng huphurh a, mahni thawhtheih hna, hnamdang te thawhtir' chu thlak danglam mek zel a ni a ti a. 'Kan mikhual te, kan thawhai thawka kan sum an rama hawn thla leh thin te thawhtur kan thawhkhalh a hun tawh', tiin hnathawh kawnga harhtharna chu 'Ram leh hnam humhalhna' atana hmanraw pawimawh tak a nih thu a sawi a. SHGs te chu midang te chawkphurtu leh midang te entawn tlak an nih theih nan theih tawp chhuah zel tura fuihin kum 2023 ah phei chuan Mizoram chhunga khua zawng zawngah SHGs te din vek sawrkarin a tum a ti.

Regional Saras Fair 2016 chungchang sawihawngtu, Pu Lalhmingthanga, Secretary, RD Mizoram Rural Development Department hnuaia Mizoram State Rural Liveluhoods Mission (MzSRLM) hmalakna hrang hrang, SHGs te din a lo nih dan te a tarlang a. MzSRLM hmalakna chu kum 2013 khan Serchhip leh Kolasib District-ah tan niin Serchhip RD Block ,East Lungdar RD Block, Bilkhawthlir RD Block leh Thingdawl RD Block ah te hmalakna hmasa neih a nih hnuah kum in khan Siaha, Champhai, Mamit leh Lawngtlai Districts ah te huang zauh niin tunah SHGs 1244 awm mekin chhungkua 10,242 tuam mek a nih thu a tarlang.

Kum 2016 chhunga MSRLM hnuaia SHGs titha te hnenah lawmman sem a ni a. East Lungdar RD Block atangin Mari SHG, N.Vanlaiphai, Serchhip RD Block atangin Jeptha SHG,Keitum, Thingdawl RD Block atangin Jehova SHG, Bualpui leh Bilkhawthlir RD Block atangin Vau SHG, Bilkhawthlir ten Best SHGs award RD MinisterPu R.Lalzirliana hnen atang an dawnga. MzSLRM hmalakna phochhuak tha berah Bilkhawthlir RD Block in lawmman- chawimawina thuziak leh Rs.10,000/- a dawng bawk a ni.

Pi K. Lalrinzuali, State Mission Director, MzSRLM in a tarlan dan chuan Regional Saras Fair 2016 ah hian Dawr 126 an inziaklut tawh a, State pawn lam atanga rawn la kaltur leh kalkawnga la thang mek te nen chuan dawr hawn belh nual beisei a ni.

Attachment

  • Loading attachment...