Vawiin khan Health Department, Lawngtlai buatsaihin Lawngtlai DC Conference Hall-ah nau chunga nu thihna chungchang zir hona (District Level Sensitization Meeting on Community & Facility Based Maternal Death Review) hun hman a ni.

He hun hi Lawngtlai District Senior Medical Officer Dr S.Thaizi chuan a kaihruai a. Chief Medical Officer Dr Thani Pachuau chuan kal khawmte lawmna thu leh hun hman chhan tlangpui a sawi.

Vawiina sensitization meeting-ah hian hriselna lama thawktu te, kohhran leh tlawmngai pawl hrang hrang ai awh thahnem tak an tel a. Nau chunga nu thihna chungchang leh, a chhan hrang hrang awm theite zir ho niin, a tihniam tura hma lak dan tur te, hmasawnna tur leh siam that tur te ngaihtuah hova sawi ho a ni.

Hmeichhia kum 15-49 inkar hi nau pai thei china ngaih an ni a. Hmanraw nei that tawk loh vang leh thil hriat loh vangin nau chunga nu thihna a thleng thin a. Hemi hi tihniam a, tireh turin he inzirtirna hi buatsaih a ni.

Kumin hian Lawngtlaiah nau chunga nu thihna (maternal death) tum khat a thleng tawh a. Maternal Mortality Rate (nau piang nuai 1 zela nu thi zat) hi 143 a ni. MMR tihniam tur hian sub-centre hrang hrangah nau neihna hmun siam tum a ni a. Nau chhar tur (attendant) zirtir (train) mek zel an ni bawk. Nu nau paiin an mamawh ang enkawlna an hmuh ngei theih nan leh damdawi inah ngei nau an neih theih nan health worker leh ASHA te'n hma an la thin a. Hemi kawngah hian District Hospital pawh tihchangtlun mek zel a ni.