Hun engemaw chen Saitual bial fang tura fehchhuak Home Minister Pu R. Lalzirliana chuan vawiin chhun khan Keifang Community Hall-a thlantlin anih lawmpuina inkhawmah mipui vantlang hmaah thu a sawi.

Home Minister chuan tum 4 lai Saitual bial atanga ram rawngbawl tura thlan tlin anih avangin leh amahah rinna thui tak an neih avangin helai bial mipuite chungah lawmthu a sawi a. Sorkar-a rinna thuk tak nei a sorkar hmalakna te tawiawm turin a sawm nghal a ni. Mizoram sorkar-in rethei dawmchhuahna tura a hmalakna pui ber NLUP pawh chak taka bawhzui zel a nih tur thu te, he programme hmang tangkaitu an nih theih nana rinawm leh dik taka an sum hmuhte hmang tangkai tura fuihin Mizoram leh Saitual bial chu ramnuam leh hmasawnah siam theih a nih tur thu a sawi a ni. Pu R. Lalzirliana chuan Saitual khua chu District Hqrs. ah siam turin hmalak zui anih dan te, 14th Finance Commission lozin huna an hnena thlen tur lehkha pawimawh tul hrang hrang cheng vaibelchhe 50 lai ruahmanna nen buatsaih mek anih dan te, Chief Minister leh Chief Secretary te kaltlanga heng lehkha pawimawh hi thehluh tur buatsaih mek anih dan te a sawi.

Tun hnaia NLFT leh Tuikuk hel pawl thenkhatin mi an rukbo chungchang leh him taka chhuah an nih dan sawichhuakin Home Minister chuan he thil thleng atang hian Zo ze mawi, hawihhawmna te, dawhtheihna leh zaidawhna te kan zir thar leh a tul a ni a ti a. Mizoram hi Zo hnahthlak zawng zawngte tana an Jerusalem anih angin ramnuam leh muanawma siam turin a chhung a cheng zawng zawng ten mawh an phur a ni, a ti. Rukbo thlenna hmunah hian mipuite ngenna angin Police Outpost dah tura buatsaih mek anih dan te, tunah pawh Police Platoon 1 chu dah lailawk an nih tawh dan te, helai hi Forest hmun pawimawh anih avanga Forest Department te nen thil awmdan sawitlana ngaihtuah zui a tul dante pawh a tarlang a ni.

Home Minister hian Saitual bial chhung khaw hrang hrang tlawhin sorkar hmalakna leh hmachhawp mekte a fangkual dawn a ni.