No.1096/2020-2020

Mizoram Sorkarin State dang atanga rawn haw te Home Quarantine theih dan chungchang Lehkha No.B.13021/105/2020-DMR hmanga Circular Dt 08.05.2020-a a chhuah behchhan hian a hnuai ami ang hian Lunglei District chhunga Home Quarantine tur chungchanga hriatturte tarlan a ni a. Hei hi Home Quarantine-a awmte leh chhungkua pawhin an zawm ngei tur a ni.

A : Home Quarantine Dil dan
1. Deputy Commissioner hnenah ziakin dilna (application) an thehlut tur a ni. Dilna hi State danga an awmna hmun an rawn chhuahsan hmaa thehluh tur a ni.
2. Home Quarantine-a awmin a hman tur bik bedroom leh toilet hran a awm ngei tur a ni a, hei hi VLTF ten an enfiah ang.
3. Home Quarantine-a dah tlak ni-a VLTF-in a pawm chuan lehkha a siam anga, chu chu Diltu-in dilna (application) a thehluh-ah hian thil tel tur a ni. VLTF hian lehkha hran siam kher lo pawhin Dilna lehkhaah pawh chiang takin Home Quarantine theih a nih chungchang hi a ziak lang thei ang.

4. Home Quarantine dilna, VLTF-in a pawmpuite hi Deputy Commissioner hnena thehluh a nih hnuah District Medical Board-in an lo en leh anga. Pawmlohna tur chhan dang a awm loh chuan DC/Chairman, District Level Task Force-in Home Quarantine phalna hi a pe thei ang.
5. Home Quarantine hi phalsak a nih pawhin Rapid Antibody Test (RAT)-a negative/non-reactive te chauh Home Quarantine-a awm theih a ni ang.
6. Home Quarantine turte hian Ministry of Health & Family Welfare, Govt of India-in Home Quarantine inkaihhruaina a duante an zawm ngei ang tih ziakin intiamkamna an nei hmasa vek ang.

B : Home Quarantine-a awmdan tur.
1. Home Quarantine hian Ni 14 chhung awm tur a ni anga. Home Quarantine chhung hian midang nena inhnaih lova awm tur a ni. A bik takin kum upate, naupang, naupai leh hriselna lama harsatna nei midangte nen inhlata awm tur a ni.
2. Awmna room chhuahsana inchhung hmun danga kal loh tur a ni.
3. Tui leh sahbawn emaw, sanitizer emaw hmanga fai taka kut sil fo tur a ni.
4. Inchhunga midangte nen hmanrua (thleng, no, towel, puan, mobile phone charger, etc) engmah in hman tawm loh tur a ni.
5. Midang nena inbiak dawn leh inhnaih dawnin mask vuah reng tur a ni.
6. Mask leh bawlhhlawh dangte bleaching solution emaw hypochlorite solution emaw hmanga chiah/sawngbawl (disinfect) tur a ni a, heng bawlhhlawhte hi thuk taka phum tur a ni.
7. Medical Team in test tura hun remchang an ruahman hunah test hi neih leh tur a ni ang.
8. Khawsik, khuh leh thawk lama harsatna a awm chuan medical mite hnenah pawn chhuak lovin Phone Number 6033151202/7629072340-ah in report nghal tur a ni.

C : Chhungkuaa midangte zawm tur.
1. Chhungkaw zinga ruat bikin Home Quarantine-a awm chu a enkawl ang.
2. Enkawltu nen pawh hian taksa intawkin an awm tur a nil ova, puan leh thawmhnaw thinpharh loh tur a ni.
3. Thil tihfaiin glove bun tur a ni a. Glove phelh hnuah fai taka kut sil zel tur a ni.
4. Midang inleng neih loh tur a ni.
5. Home Quarantine-a awm mekah natna a langchhuak (symptomatic) a nih chuan amah hnaiha awm pawh ni 14 chhung quarantine phawt tur a ni. Chumi hnuah Home Quarantine-a awm tawh sa (natna pawh lang chhuak) chu test a nih a, negative/non-reactive result a nei tih hriat hma emaw, ni 14 dang emaw inenthlak nan quarantine hi chhunzawm tur a ni.
6. Home Quarantine-a awm mek room chhunga thil awm leh kuta khawih fo thin thil dangte, toilet leh bathroom te chu nitin bleaching solution emaw hypochlorite solution emaw hmanga tihfai/chiah/sawngbawl (disinfect) tur a ni.

D : Home Quarantine tur hruai dan.
1. Home Quarantine hi Rapid Antibody Test result-a negative/non-reactive te tan chauh phalsak tur a nih avangin permission hi Home Quarantine tura dil/dilsak chu a rawn thlena test a paltlang vek hnuah chauh pekchhuah tur a ni ang.
2. Home Quarantine tura phalsak/qualify te hruaitur hian a hruaitu turin two wheeler ni lovin lirthei ke pali nei a keng tur a ni a, hruai haw turin mi pakhat chauh kal tur a ni. State pawn atanga rawn haw hian ama bungrua chu amah in motor hnungah a dang ang a. Motor pakhatin mi pahnih aia tam a hruai haw tur a ni lova. Driver seat bul (front seat) dah awl tur a ni.
3. Hmun dang khawiah mah ding leh peng kual lovin Home Quarantine na tur hmun an pan tlang nghal tur a ni.
4. State pawn atanga rawn haw te hi Quarantine Centre hrang hrangah dah an nih dawn avangin heng centre ah hian medical test neih zel tur a ni a, chuvangin rawn haw te hruaitu tur chuan an hruai haw tur ten an rawn panna hmun Quarantine Centre chu an ngaihven reng tur a ni.