1723/2023-2024
Aizawl, 31st August, 2023 : Vawiin khan Pu H.Lalengmawia, Commissioner & Secretary, Home Department office-ah, Home Department Officer-te leh Meitei, Mizoram University leh Pachhunga University College-a thawk aiawhte chuan Hmar Students’ Association te leh Zirlai Pawl dangte'n Mizoram Meitei-te laka vauna lam hawi thuchhuah an siam chungchangah Governor of Mizoram hnenah Meitei faculty (Teaching and Non-Teaching) te'n Campus chhung leh pawna khawsaten an hna an thawh chhunzawm leh thuai theih nana hma laksak tura an ngenna chungchang sawiho a ni a.
Tun dinhmunah, chhungkaw thil avanga pakhat la zawm loh tih loh chu Meitei te hian an hna an zawm leh vek tawh tih an sawi a. Mizoram sawrkar leh University-a an thawhpuite, abiktakin Home Department hmalakna chu chhuanawm an tiin thlamuanthlak an tih thu an sawi a, Sawrkar leh mipui zahngaihnaah lawmthu an sawi.
Mizoram chu muanawm leh hnathawhna hmun nuam tak anih thu te, Mizo-te chu fel an tih thu te an sawi a. University-a an mawhphurhnate pawh tha tak leh dik taka thawh zel an tum thu an sawi bawk a ni. Tun dinhmunah Mizoram chu ram ralmuang, chenna tlak a nihzia an sawi lang bawk.
Pu H.Lalengmawia, Commissioner & Secretary, Home Department chuan Manipur-a chi leh chi inakara buaina a chhuah tan ni, May Ni 3, 2023 atang khan, DC-te leh District S.Ps te, thuneitu dangte hnenah Mizorama Meitei te sahimna tura hma la theuh turin Home Department chuan a hrilh thu a sawi a. Sawrkarin theihtawp chhuahin Mizorama Meitei te sahim nan hma a la a, alak chhunzawm zel tur thu pawh a hrilh bawk a ni. Home Commissioner hian nakin huna harsatna an thawh thulhah an harsatna te chu Home Department-ah thlen zel turin a chah bawk.
Inkawmna hi boruak zang khai tak hnuaiah neih a ni.
