1724/2023-2024

1st September, 2023 : Nimin khan Lawngtlai Press Club-ah District Election Office, Lawngtlai leh Mizoram Journalists' Association (MJA), Lawngtlai District ṭang kawp chuan Lawngtlaia political party hrang hranga IT & Media Cell-te pualin 'Media Awareness Campaign' an buatsaih.

Lawngtlai District MJA General Secretary Pu Lalchharliana kaihhruai he hunah hian hun hmanpuitu Lawngtlai Election Officer Pu Denny Lalchhuanawma chuan Assembly inthlanpui lo awm turah inthlan felfai leh thianghlim a awm theih nan political party-te pawimawhna a lian hle tih sawiin, boruak ṭha siam tura hma lakna nasa zawk kalpui zel turin political party ai awh kal khawmte chu a ngen a. Election Commission of India (ECI)-in inkaihhruaina hrang hrang a siamte ṭha taka zawm a nih chuan inthlan felfai tak a awm ngei ang tiin, political party leh mipui lam pawhin inthlan kaihhnawiha hriat duh an neihte hrilhfiah a, an harsatna sut kianpui turin District Election Office chu a inhawng reng a ni, a ti.

He hunah hian Lawngtlai District MJA President Pu Lalngheta Ralte chuan political party-a media lama mawhphurhna neite chu an sukthlek, an thu theh darh duh zawng leh an ṭawngkauchheh thlengin mipui kaihruaitu ber an nih avangin fimkhur leh puitling zawka kal turin a ngen a. Political party-te'n media an hman ṭangkai a, an hman thiam leh thiam lohvah ram sukthlek a kal fuhin a kal fuh lo thei tiin, political party hrang hranga media-te leh journalist-te'n thawh hona ṭha tak an nei chu lawmawm a tih thu a sawi.

He media awareness campaign-ah hian Bharatiya Janata Party (BJP), Indian National Congress (INC), Mizo National Front (MNF) leh Zoram People's Movement (ZPM)-a IT & Media Cell ai awhte telin, chawhnu lam, District MJA Vice President Pu Elvis Lalthangzuala kaihhruaiah political party ai awhte'n an ngaih pawimawh zawng thu an sawi hlawm a. Inkawm hona hun hlawk tak hman zui niin, District MJA Treasurer Pu H. Lalrinmawia'n lawm thu sawiin hun a khar a ni.