85/2025-2026

AIZAWL; the 8^th April,2025: Vawiin chhun dar 12:00 khan Registrar of Cooperative Societies, Mizoram Conference Hall, Zarkawtah International year of Cooperatives(IYC)-2025 leh Cooperation Department Golden Jubilee lawmna pual inkhawm neih a ni a. Hon’ble Cooperation Minister Pu PC. Vanlalruata chuan khuallian niin, hun a hmanpui. Lawmna inkhawm neih hma hian RCS office Varanda-ah IYC-2025 leh Golden Jubilee hriatrengna monument a hawng bawk a ni.

He hunah hian thuchah sawiin khuallian Pu Ruata chuan kumin 2025 hi UN in a tum 2 nan International Year of Cooperatives (IYC) atan a puang a, a thupuiah pawh ‘Cooperatives build a better world’  tih a hmang a, kum 2012 kha a tumkhatna chu a lo puang  tawh a ni. Chuvangin kumin 2025 hi khawvel huapa Cooperation Dept. ngaih pawimawh kum a ni, kan ti thei ang. Kumin UN in IYC kuma a puanna chhan hi kum 2030 ral hmaa UN in ram hrang hrang tana Sustainable Development Goals (SDGs) hlawhtlinpui vek tura a bituk puala hmalakna chi khat a nih pawh a rinawm a ni. Mizoram State pawhin IYC pual hian hmalakna hrang hrang kan nei dawn a. Cooperative Movement hmang hian kan state kan ti hmasawn thei a, kan thalaite hi Cooperatives Movement-ah hian kan hnuhluh a ngai tak zet tawh a ni. Chumi atan chuan College zirlai te zingah Awareness campaign pawh kan neih tepawh a tul hle dawn a ni. Cooperation Dept. kaltlanga Mizoram hi ti hmasawn tur chuan Society leh Union hrang hrangte nen kan tanrual thiam a ngai hle dawn a. UN in kumin IYC atana a puan denchhen hian Mizoram pawhin Cooperation Dept. kaltlang hmasawnna rahbi thar a tuk theih nan, Society leh Union hrang hrangte thawhpuiah ka sawm che u a, chak zawka ram rawng kan bawl zel theih nan duhsakna ka hlan bawk che u, a ti.

Khuallian hian MCAB ten Cooperation Dept. in ‘Awareness Rally’ an huaihawt huna hak tur atana an sponsored T-Shirt a tlangzarh nghal bawk a ni.

Vawiin programme hi Pu John L.T. Sanga, MCS, Registrar of Cooperative Societies, Mizoram chuan kaihhruaiin, Pu Lalmalsawma, Joint Registrar, Cooperation Department chuan Keynote Address sawina hun a hmang a. Pu Amit Sharma, IAS, Secretary, cooperation Department pawhin thu sawina hun a hmang.

Vawiin hun hmanah hian Society leh Union puipa te tangin thusawi ngaithlak a ni a, Power Point Presentation hmangin IYC-2025 chungchang leh Cooperation Department lo indin chho dan,an hmalakna hrang hrang leh hmachhawp te entir a ni bawk.

Pu A.N. Barbhuiya, Additional Registrar, Cooperation Department in ‘vote of thanks’ a sawi zawhah, "Aw Lalpa I malsawmna hlu" zaihona in vawiin inkhawm chu khar a ni ta ni.