4391/2024-2025

Champhai, 22nd February 2025: Hon’ble Justice Pi Marli Vankung, Judge, Gauhati High Court chuan zankhat riaka Champhai tlawh turin nimin chawhnu khan Champhai a lo thleng a. Nimin tlai khan District Court tlawhin, an dinhmun te a enfiah a. Tukin khan Champhai Dinthar Venga Judicial Quarters sakna tur hmunhma leh Champhai Vengsanga District Court Building thar sak mek te tlawhin; Khawzawl District Court leh Judicial Quarters sakna tur hmunhma Khawzawl Darngawn Venga mi pawh a tlawh bawk a ni.

Hon’ble Justice Pi Marli Vankung-in Champhai District Court a tlawhna hunah hian Pu Liansangzuala, District & Sessions Judge chuan Champhai Judicial District dinhmun a sawifiah a. Champhai Judicial District hi November ni 11, 2021 khan hawn niin, tun dinhmunah District & Sessions Judge hovin Civil Judge Sr. Division (Chief Judicial Magistrate) 1 leh Civil Judge Jr. Division (Judicial Magistrate First Class) 1 ten an thutchilh mek a. Judge Post 7 ruahman atangin post ruak pali a awm mek a; supporting staff post 23 awmah post 13 hnawhkhawh tawh a ni a, post 10 a la ruak mek a ni.

Champhai District Court hian December 2024 leh January 2025 chhung khan Case 241 an chingfel a. Tun dinhmunah Case kal lai mek 647 a awm a, heng zinga Case 344 (53%)  chu ND&PS Act kaihhnawih a ni. 

District Court a tlawh hnu hian Champhai Bawrhsap Pu VL Remliana hovin Honble Justice Pi Marli Vankung hi Circuit House-ah lo dawnsawn a ni a. He hunah hian SP Pu Shivendu Bhushan, Excise & Narcotics Asst. Commissioner Pu C Thangchuanga leh DCPO Pi R. Lalrinchhani te an tel a. Champhai District chhunga dan leh thupek kenkawh dan te leh naupang venhimna chungchang te an sawiho a ni.

Tukin khan Hon’ble Justice Pi Marli Vankung hian Champhai Vengsanga District Court Building sak mek leh Champhai Dinthara Judicial Quarters sakna tur hmunhma a tlawh a. Champhai Vengsanga District Court Building sak mekah hian hna za zela 42% thawh zawh tawh a ni a. Dinthar Vengah hian Judicial Quarters Grade – II pahnih leh Grade – III pahnih sa turin ruahmanna a kal mek a ni.

Tukin vek khan Hon’ble Justice Pi Marli Vankung hian Khawzawl District Court leh Judicial Quarters sakna tur hmun Khawzawl Darngawn Veng ami chu a tlawh bawk a. He hunah hian Khawzawl Bawrhsap Pu K. Vanlalthiana leh SP Pu F. Lalbiakzauva te bakah Darngawn VCP Pu Lalbiakzara te nen Court hmun tur hi an enfiah a ni. Justice Marli Vankung hian mipui ten awlsam zawka Court an pan theih nan Khawzawla District Court din chu an ngaihpawimawh thu leh rang taka hmalak tum a nih thu a sawi a ni. 

Justice Pi Marli Vankung hi Dr. H.T.C. Lalrinchhana, Registrar, Gauhati High Court, Aizawl Bench, leh Pi Melody Lalrochampuii Pachuau, Joint Secretary, Law & Judicial Department ten an tawiawm a ni.