3761/2024-2025

Dated Lawngtlai, 11th January 2025 : Vawiin khan Hon'ble Justice Vijay Bishnoy, Chief Justice of Gauhati High Court, leh Patron-in -Chief, Mizoram State Legal Services Authority (SLSA) nibawk chuan District Jail Lawngtlai tlawhin ' Special Campaign for Old Prisoners & Terminally Ill Prisoners & Skill Development' a hmanpui a. Justice Michael Zothankhuma, Judge, Gauhati High Court, leh Executive Chairman, Mizoram State Legal Services Authority (SLSA) nibawk chuan Chief Justice hi a tawiawm.

Hon'ble Justice Vijay Bishnoy chuan mitin tana  rorelna dik awm turin National, State leh District -a Legal Services Authority ten kawng hrang hranga hma an lak thin thu sawiin, Legal Aid Program - chu a laimu leh pawimawh ber zing a mi a ni, a ti. Chief Justice chuan  India rama Jail zawng zawngah 'Skill Development and Enhancement Programme' kalpui a nih tawh thu tarlangin, hei hian a tum ber chu Jail tangten eizawnna tlak thiamna an neih bakah Jail atanga an chhuah hun a,  nunphung pangai a an khawsak  theihna tur a ni, a ti. Mizoramah he campaign tha leh fel fai taka kalpui a nih avanga Jail tang mek leh chhuak tawh ten hlawkna tam tak an hmuh kawngah Mizoram SLSA leh DLSA hnathawh fakawm a tih thu a tarlang.

Chief Justice chuan National Legal Services Authority in 'Special Campaign for Old Prisoners & Terminally Ill Prisoners' a kalpui chhan ber chu kum 70 leh a chung lam bakah tihdam theihloh natna neite jail atanga a hma lama  an chhuah theih dan kawng ngaihtuahpui a nih thu a tarlang a. Jail atanga chhuah nghal  theih an nih loh pawhin an dikna chanvo zah sak leh duat  taka enkawl hi a tum ber a ni, a ti. Justice Vijay Bishnoy chuan 'Special Campaign for Old Prisoners & Terminally Ill Prisoners' hnuaiah State leh District level-ah Team din vek tawh a nih thu tarlangin, Kum 70 leh a chunglam bakah tihdam theihloh natna veite zawn chhuah bakah  a tul anga hmalak mek a nih thu a sawi a.  District Unit - te chu Probation Officers,  After-Care Officers,  Welfare Officers emaw  NGO- te nena thawhhona tha tak neih a tul thu a tarlang bawk.

Justice Vijay Bishnoy chuan District Jail,  Lawngtlai bikah ' Old Prisoners & Terminally Ill Prisoners' an awm lo chu lawmawm a tih thu a tarlang a. Jail chu misual  dahkhawmna hmun anga ngai lo tur leh nungchang siamthatna hmun pawimawh tak, khua leh tui tha taka siamna hmun ang zawng a  thlir thiam turin kalkhawmte  a chah a. ' Special Campaign for Old Prisoners & Terminally Ill Prisoners & Skill Development' a hlawhtlin nan a theihtawp chhuah turin, Mimal, Tlawmngai Pawl leh Sawrkar Department hrang hrangte thawhpuiah a sawm bawk.

Justice Michael Zothankhuma, Judge, Gauhati High Court, leh Executive Chairman, Mizoram State Legal Services Authority (SLSA) nibawk chuan thu tawi sawina a nei a. Mizoram chhunga Jail hrang hrangah inenkawlna felfai tak kalpui a ni, a ti a. Jail tangten kut themthiamna an neih theihna tura  program chi hrang hrang kalpui thin a nih thu a tarlang.  A bik takin Central Jail, Aizawlah Huan/thlai enkawl, vawk leh Ar vulh, Sam meh, Carpentry, Computer zirna leh a dangte kalpui mek a ni tiin, Skill Development chu chak zawk a kalpui zel a nih tur thu a sawi.

Vawiin ' Special Campaign for Old Prisoners & Terminally Ill Prisoners & Skill Development' District Jail, Lawngtlaia neih ah hian Pu Cheemala Siva Gopal Reddy, IAS, District bawrhsap chuan kalkhawmte lawmna thu sawiin, sawrkar Head of Department -te an tel kim tha hle a. Pu Vincent Lalrokima, Member Secretary, Mizoram State Legal Services Authority, chuan lawmthu sawina neiin hun a khar.

District Jail, Lawngtlai hi Jail tang mi -90 awm theihna niin,  tun dinhmunah Jail tang mi-36 an awm mek a ni.