3762/2024-2025

Dated Serchhip, the 11^th January, 2025: Mizoram Chief Secretary Pu Khilli Ram Meena chuan vawiin khan Serchhip District a tlawh a. Serchhip DC Office Pisapui Hall ah Serchhip District chhunga sawrkar hotute nen meeting pawimawh tak an nei a ni.

Meeting-ah hian Chief Secretary chuan Serchhip District chhunga sorkar scheme leh programme hrang hrangte tangkai taka kalpui a tul thu a sawi a. Hmasawnna atana hmalakna pawimawh tak tak - hriselna, zirna, leh hmasawnna ruhrel dinna tur project hrang hrangte dik taka kalpui leh a hun taka zawhfel a tul thu sawiin, official-te chu tualchhung mite harsatna tawh chingfel turin an inpeih reng tur a ni, a ti bawk.

Pu Meena chuan mipui tana rawngbawlna hi sawrkar hnathawkten hna an thawhchhan a ni tih hre turin a chah a. Hmasawnna hna thawh a hun taka zawhfel a nih theih nan department hrang hrangten tanrualna leh thawhhona tha an neih a pawimawh a ni, a ti. Serchhip District chu Literacy Rate ah India rama sang ber a ni a, chuvangin, thalai lehkhathiam ten eizawnna hlawk leh tha zawk an neih theih nan zirtir uar turin a chah a. Ram leh District hmasawnna hna theihtawp chhuaha thawk zel tura fuihin, Mizoram Sawrkar Flagship Programme - Handholding Policy pawh tihlawhtling  bertu District ni ngei turin Chief Secretary chuan Head of Office te a fuih a ni. 

Deputy Commissioner Pu Paul L Khuma chuan Serchhip District nihphung leh dinhmun te; hmasawnna hna hrang hrang sawrkar department ten an kalpui dan chipchiar takin a sawi a. District tana hlawhtlinna an hmuh te leh hma an hruaina te; harsatna an tawh thenkhat te powerpoint hmangin a sawifiah a ni.

Serchhip SP Pu MS Dawngkima pawhin Serchhip Police dinhmun leh District chhunga Out Post & Checkpost dinhmun leh an  inrelbawl dan tlangpui te, Dan leh Thupek kenkawhna kawnga Serchhip Police te chet dan leh hmalak dan tlangpui report a pe bawk.  

Vawiin chawhnu a Chief Secretary hoa meeting-ah hian Serchhip District-a Head of Offices te an tel kim hle a. Serchhip a sawrkar Department hrang hrang te hmalakna leh hmachhawp mekte sawihona hun hlawk takin an hmangho bawk a ni.

Meeting hi SDO (Sadar) Pi F Lalnisai’n a kaihruai a ni.