2244/2024-2025

AIZAWL; the 26th September, 2024: Vawiin chawhnu dar 2:00 PM khan Forest, Environment & Climate Change, etc. Minister Pu Lalthansanga chuan NABARD-RIDF-XXVI sum ₹68, 72,029/- senga sak Sihphir Higher Secondary School building thar, Sihphir Kawn venga mi chu a hawng.

Building thar hawnna inkhawmah thu sawiin, Minister chuan vawiin a building thar hawngtu tura min sawm hi lawmawm ka ti rualin, midang hnathawh sa-ah par lo chhuang ve a ka inchan a, a inthlahrunawm ka ti hle mai. Amaherawh chu technical report atanga kan lo ngaihthlak tawh angin, building sak nana NABARD atanga a daiha sum sanction vek tawh si, hnatawh tak tak nana ₹ 47,00,000 chauh awm ta mai leh mipuiin  ₹4,48,200 an thawh belh a ngai erawh pawi ka ti hle a, hetiang a nih avang hian a ni,  kal phung thar tih hi kan tlangau pui thin ni, a ti a. Sihphir mipuite inpekna erawh ropui a ti tak zet thu a sawi.

Pu Lalthansanga chuan Sihphir chu khaw taima, kuthnathawk khua, thlaihring leh bawnghnute a Aizawl  khawpui chawmtu tih thei hial in ni a.  Ramsa leh Ramngaw humhalhna kawngah pawh  khaw dangte entawn tlak in ni.  Hemi avang te pawh hian a ni ang malsawmna pawh in dawng nasa hle a ni. Zirna lamah pawh tunhnaia Competitive Examination hrang hrangah hlawhtlinna in chang thin niin ka lo hria a, ka lawmpui hle che u. Vawiin Higher Secondary School kan hawn tak pawh hi in tangkaipui hle ka beisei a, he school in khawtlang leh ram tan mi chhenfâkawm a chherhchhuah teuh theih nan duhsakna ka hlan bawk a che u, a ti.

Vawiina Sihphir HSS building thar hawn tak hi 17m x 6.5 m a zau a ni a, 17th January,2023 a sak tan a ni a, 25th September,2024 a sak zawh a ni.  A sak nan hian NABARD- RIDF-XXVI atangin ₹ 68, 72,029 sanction a ni laiin, a taka a sak nana sum awm chu ₹47, 00,000 a nit hung. Mipui te thawhkhawm ₹4, 48,200 nen, a vaiin  ₹51,48,200 sen a ni. A sak hna hi MW Venture te thawh a ni a, Staff room 1, Class room 2, Principal room, Computer room, Library leh toilet 2 a awm. Zopa chhiara chhawng 3 a ni a, a chhawng hnuai ber hi la khawrhpum loh deuh a ni.  Class XI zirlai 97 leh Class XII zirlai 54 awm mekin, Classroom an mamawh belh thu leh a chhawng hnuai ber chu Classroom a tana siam sak turin Minister hnenah hian ngenna an lo thlen  bakah, Provincialized adhoc Grant- in- Aid a hlan kaih a nih theih nana tanpui turin an lo ngen bawk.

Vawiin Sihphir HSS building thar  hawnna inkhawm hi Pu Lalnelawma, Chairman, Managing Board chuan kaihruaiin, Pu C.Chhuanawma, Committee member in Technical report a pe.