Vawiin chawhma dar 11:00Am khan Noaotlah khua-ah Hon'ble MoS Dr.K.Beichhua chuan Eklavya Model Residential School(EMRS) cheng Vaibelchhe Rs.24/- senga sak tur lungphum a phum.

Lungphum phumna hunserh hi Rev.C.Beima,Moderator, ECM(H) chuan hmangin, Minister chuan EMRS lungphum hi a phum ta a ni.

EMRS Foundation Stone phun zawhah hian Lungphun lawmna puala inkhawm hi Noaotlah Community Hall -ah hmanzui nghal a ni a.He inkhawm hi Pu Bhupesh Chaudhary IAS, district Bawthsap chuan a kaihruai.

Dr K.Beichhua chuan thuchah sawiin, Noaotla khawtlangin EMRS dinna atana kphal taka ram an pe chu lawmawm a tih thu a sawi a, zirna chu khawvel hmun danga hnam fing leh thiam zawkte kan el phakna awmchhun a ni; a ti. Mizoramin IAS, IPS Kan neih leh theihna tura kailawn pawimawh tak pakhat chu vawiina a sakna tur lungphum kan phum mek EMRS hi a ni, a bawk. Siaha District-ah hian EMRS 2 a awm dawn ta, pakhat zawk hi Tipa khuaah awmin, sak zawh tep tawh a ni.

Dr. K. Beichhua chuan opposition lamin Khawnge Rs nuai 3 in sem tur chu? tia min nuihzat thin chu Pathian zarah a kaihhruai AH&Vety, Fishery and Sericulture chuan sem theih turin an peih tep tawh a, district tinah a dawng tur thlangchhuaktu tur, DC kaihhruaina hnuaiah Selection Board din tawh a ni, a ti.

Sorkar flagship programme SEDP hnuaiah Amah chairman a nihna Social Rehabilitation Bored pawhin state sorkar sum, Rs nuai 1000 hmangin ruihhlo ngaite enkawlna tur hmun Sethawn, Kolasib District-ah Jordan Centre din that hna chak takin a thawk mek tih a sawi bawk.

Excise Minister ni bawk Dr Beichhua chuan zu chungchangah tunhnaiah MLP Act, 2019 hnuaiah MLP Rules tihchhuah chuan inhnialna a tihchhuah thu leh sorkar chu zu zuar tur anga tlang thuthang awm chu pawi a tih thu sawiin, Chief Minister Pu Zoramthanga kaihhruai sorkar hian Mizoram mipui hmaa a intiam angin Zu a zuar dawn lo; tiin a sawi.

Dr Beichhua chuan sorkarin kawngpui siam a ngaihpawimawh thu sawiin, Siaha khawpui ngei pawh tun anga khawchhung inkalpawhna kawngpui tha an neih a hriat ngai loh thu a sawi bawk.

EMRS hi India rama hnam hnufual zawk leh dinhmun chhe zawk naupang ten, india rama zirna tha ber ber a zirlai te an el phak ve nan, a thlawn liau liau zirna an pekna hmun tur a ni. CBSE syllabus an hmang dawn a ni. Noaotlah khuaa EMRS school-ah hian mipa zirlai naupang 240 leh hmeichhe naupang 240, an vaiin 480 an awm thei dawn a ni.Residential school atana facilities pawimawh zawng zawng a kim vek dawn a ni.Hostel te, School building te, Labaratory hrang hrang te,etc a tel vek dawn bakah Teaching staff leh Non teaching staff te tan pawhin chenna quarters, a chhunga furniture a thuamsa vek sak a ni bawk ang.

EMRS Noaotla hi Perpetual Construction & Consultancy Services ten a sak hna an thawk dawn a, ram square metres 96250 a zau-ah an sa dawn a ni. A sakna sum hi Ministry of Tribal Affairs atanga dawn a ni.