Vawiin khan Pu Lalchhandama Ralte School Education Minister chuan a bial chhung hmar tlangdung khua Sailutar, Ratu, Lungsum, Damdiai leh N.Vervek khua te a tlawh.

Minister chuan heng khaw hrang hrang a tlawhnaah hian hmar khaw thim tieng turin sorkarin hna a thawk mek a ni a ti a. Minister chuan inthlan lai atanga a ngaih pawimawh kawng thumah hna thawh mek a ni tih sawiin Minister chuan Hmar khawthim tieng turin Manipur nena inkalpawhna tur Tuivai lei dawh turin tender chhuah a ni a, Bhaga nena inkalpawhna tur kawngpui sial nan survey buaipui mek a ni a ti bawk.

Minister chuan Hmar tlangdung zirnain hma a sawn theih nan hma lak zel a ni a, hmar tlangdungah zirtirtu 80 chuang dah thar a ni a, thawktu quarters 10 chuang sak thar a ni a ti bawk. Hmar tlangdungin Science zirna lamah hma a sawn theih nan Darlawn Higher Secondary School-ah Science zirna dah a ni dawn tih a sawi bawk.

Minister chuan Kut hnathawktuten hriselna tha an neih theih nan sorkarin hna a thawk zel a. SEDP atanga damdawiin awm man pekna tur inremna siam a ni a, kut hnathawktu dam lo ten sorkar hnathawk ang bawkin inenkawlna an bill thei dawn a ni a ti bawk. Minister chuan sorkarin khawtlang mamawh chi hrang hrang a thawk zel dawn a, mipuite chu sorkar tawiawma thlawp tlat turin a sawm bawk.

Pu Lalmuanpuia MLA pawhin thusawiin Sorkarin SEDP chu kan ram mamawh mila kalpui tum a ni a ti a. Kut hnathawktuten awmze nei taka hna an thawh theih nan SEDP hian hna a thawk chho dawn a, Project a buaipui mek a ni a ti a. Tunah pawh hian SEDP hi health care ah te hian hman mek a ni a ti.

Minister-in hmar tlangdung kaw hrang hrang a tlawhnaah hian Pu C.Lalmuanpuia MLA, Pu Lalthlamuana CEM Sinlung Hill Development Council, Executive Member thenkhat Sinlung Hill Development Council te, sorkar lam atangin official thenkhatten an tawiawm bawk a ni.