2061/2022-2023 

Kolasib dated 24th September 2022: Vawiin chawhma khan Hon'ble Mr. Justice Michael Zothankhuma, Judge, Gauhati High Court chuan Project Veng, Kolasibah Fast Track Court building sakna tur lungphum a phum a. FCS & CA Minister Pu K.Lalrinliana chuan telpuiin Pi Julie Lalrinzami, Judge, Fast Track Court cum Addl. District & Session Judge chuan hun a kaihruai a ni.

Hon'ble Mr. Justice Michael Zothankhuma chuan Project Veng Kolasibah Judicial Quarters sak mek a nih bakah Fast Track Court building sak tur a lungphum phum a ni leh thei chu lawmawm a tih thu a sawi a. Thubuai chinfelna hnathawh kawnga Kolasib district mipui tan a hmun tangkai tak a nih ngei a beisei thu leh building rintlak, a nihna tur ang tak a sak a nih ngei a beisei thu a sawi bawk a ni. Justice Michael Zothankhuma chuan hmun hrang hranga Jail-ah a awm thei zat aia tam Jail tang awm tir loh tur a nih thu sawiin Kolasib District Jail pawh vawiin hian a endik tur thu a sawi bawk a ni.

Minister Pu K.Lalrinliana chuan district hmasawnna tur dah pawimawh hmasaa phal tak a Fast Track Court sakna tur hmun ruahmanpuitu Project Veng khawtlang te fakawm a tih thu a sawi a. Court-a thubuai chinfelna kawnga inlan ngai, thu hriatpuitute leh dan lekkawh kawnga thawktute tan Fast Track Court sak zawh a nih chuan sawt zawk a hna an kalpui theih phah ngei a rin thu a sawi bawk a ni.

Pu Joel Joseph Denga, Registrar, Gauhati High Court, Aizawl Bench chuan kalkhawmte lawmna thu sawiin Pi Helen Laldawngliani, Secretary, Law & Judicial Department chuan lawmthu sawina hun a hmang a, Technical report te ngaihthlak a ni bawk.

Technical report-a tarlan danin Fast Track Court building hi Cheng Vaibelchhia 13.75 hmang a sak tur a ni a, thla 24 chhung a sak zawh hman tur a tih a ni.