2060/2022-2023 

Aizawl, 24^th September, 2022 :  Zan hnih riaka Mizoram rawn tlawhtu Dr Munjpara Mahendrabhai, Union Minister of State for Ministry of Women & Child Development and AYUSH chuan vawiin khan Venghnuai, Aizawla Health & Wellness Centre leh Aijal Club Park-a State Handloom Expo a tlawh.

Dr Munjpara hian chawhma dar 9:15 khan Venghnuai Health & Wellness Centre hi tlawhin Dr ZR Thiamsanga, MLA, Health & Family Welfare Board Vice- Chairman, Pi Esther Lalruatkimi, Principal Secretary, H&FW, Dr T. Lalhmangaihi, Principal Director, H&FW leh Health department official ten an lo dawngsawng a ni.

Union Minister of State hian Health & Wellness Centre a tlawhnaah hian thuchah sawiin Mizoram sawrkar leh mipuiten an lo dawnsawn danah thinlung takin lawmthu a sawi a, India sawrkarin mipuite hriselna tha zawk an neih theihnan kawng hrang hrangin hma an la tih tarlangin amah ngei pawh damdawi lam daktawr, lung (heart) specialist a ni tih a sawi a, Surendranagar district, Gujarat-ah a awm a, Member of Parliament a nih hma hian damlo nuai 10 chuang a en hmana a inhriat thu sawiin nitin damlo 100 bawr vel a en thin thu leh damlo enna man hi damlo pakhatah Rs 2.50/- (cheng hnih leh duli) a la thin tih a sawi a, damlo rethei te te te hi an dinhmun hriatthiam saka dimdawi taka enkawl an ngai lehzual tih a sawi a ni.

Damlo inentir turte leh enkawl ngaite tan damdawi in leh a chhehvel hi fai leh thianghlim taka enkawl a pawimawh tih sawiin Venghnuai Health & Wellness Centre chu a enkawltuten neitu thinlung pu a an enkawl vangin fai tak leh thianghlim tak a ni, a ti a. Hetiang vek hi Mizoram chhung hmun hrang hranga damdawi inte pawh an nih a rin thu sawiin entawntlak a ni,a ti a. Kum 2014  hma lam khan AYUSH hi Ministry of Health & Family Welfare hnuaiah Department tereuhte a ni a, Sawrkar laipuiin AYUSH hi a ngaih pawimawh avangin Prime Minister Narendra Modi chuan nasa takin a tilian a, Ministry hran a ding ta hial a, hma sawn tir zel turin tan kan la zel dawn a ni, a ti.

Dr ZR Thiamsanga, MLA, Health & Family Welfare Board Vice- Chairman chuan Union Minister of State in Mizoram a rawn ngai pawimawh chu lawmawm a tih thu sawiin, Mizoram tan rah tha a chhuah ngei a beisei thu a sawi a, AYUSH hnuaia Mizoram dinhmunte tarlangin mamawh chi hrang hrangte a sawi a, a bik takin Physical and Stress Management Centre hi Aizawlah pakhat a awm thu leh Lungleiah pakhat sak mek a awm thu a sawi a, heng pahnih bakah hian Centre 10 dang mamawh a la nih thu Union Minister of State hnenah hian a thlen a ni.

Venghnuai Health & Wellness Centre a tlawh hnu ah Dr Munjpara hian Aijal Club Park-a State Handloom Expo (September 19, 2022 – October 1, 2022) neih mek tlawhin hetah hian Health & Family Welfare leh Commerce & Industries changtu Minister Dr R. Lalthangliana, Commerce & Industries Director Pi Florence Zotluangpuii leh official pawimawh ten an lo dawngsawng a, Expo-a stall hrang hrang 47 te a tlawh hnuah Dr R. Lalthangliana nen hian an inkawm a ni.

Dr Thangtea hian Union MoS hnenah Mizoramah ramhmul Damdawi siamna tur hnimhnah leh thlai tam tak a awm nia a hriat a nih thu a sawi a. Mizoram tan Ramhmul damdawi siamchhuahna tura hmalak leh kuthnathawktute zinga ramhmul damdawi chin leh lakkhawm dan inzirtirna nasa neih a nih phawt chuan state tan hmasawnna kawngkhatah siam belh a nih phah dawn tih sawiin Mizorama ramhnim leh thlaite zirchian (research) a tul thu leh hetih kawngah hian a tul anga hma laksak turin a ngen a, hei hi Dr munjpara hian a lo bengkhawn hle a ni.

Dr Thangtea hian D.O letter hmanga amah Union Minister of State hnena a thu thlen tawh pawh sawipui nghalin Ministry of AYUSH in Mizoram State Annual Action Plan 2022-2023 a lo pawm sak tawh chu chak taka hma lak a nih theih nan sum release thuai turin a ngen a, a bik takin Thenzawl, Lunglei, Kolasib, Champhai, Serchhip, Mamit, Lawngtlai leh Siaha AYUSH Hospital-a thawkte hlawh chu a rang thei ang bera rawn release tura ngen in Union MoS hian a haw thlak veleh a lo bawhzui tur thu in a chhang a ni.

Mizoram State Annual Action Plan 2022-2023 ah hian AYUSH damdawi in hrang hranga thawkte hlawh tur bakah Aizawla AYUSH Hospital khum 50 awmna sakna tur leh Saituala AYUSH Hospital khum 10 awmna sakna turte a tel a ni.