Horticulture Department  buatsaih ‘Horti Fair 2017’  chu vawiin chawhma khan  Assembly Annexe Building-ah Horticulture Department changtu Parliamentary Secretary Pu K.Lalrinthanga’n a khar. 

Pu K. Lalrinthanga chuan Horticulture Department-ah hmasawnna hmuh tur a awm zel chu lawmawm a tih thu sawiin Department hnathawkte thahnemngaihna vang a ni, a ti a.  Mission for Integrated Development of Horticulture (MIDH) scheme hnuaia foreign tour-ah thil thar tam tak hmuh bakah zir niin Mizoram-ah heng thlai leh thei te chinzui  anih chu tha a tih thu a sawi a, hemi kawngah hian tan lak zel a ngai a ni, a ti. Parliamentary Secretary chuan kalkhawmte hnenah chuan thlai leh pangpar an chinte chu hriatchian a tul thu hrilhin eizawnna kawnga puitu pakhat anih thu a tarlang a. Horticulture Department hnuaia hnathawk te leh thlai leh pangpar chingtute chu inpawh lehzuala thawk ho tura fuihin duhsakna a hlan nghal bawk a ni.  

Kum 2012 khan ‘Mega Sale’ tih hming chawiin Horticulture department hian Fair buatsaih tawhin kum 2013 atang khan ‘Horti Fair’ tia thlakin kumtin neih alo nita a. He Fair-ah hian stall 140 awmin chungte chu Private farm atangin 22, Division Stall- 8 leh Pangpar stall- 110 an ni a. Fair neih anih chhung hian nitin mi 3000-4000 bawr kal anga chhut a ni a. Ni 27^th May chawhma thleng neih tura ruahmanna siam a ni. 

Horticulture Director Dr. Elizabeth Saipari chuan he hun hi kaihruaiin Dy. Director (E&T) Pu H. Manthianga chuan Horti Fair 2017 report a pe a. Jt. Director (F) Pu Rosanglura chuan Divisional Award puanna neiin Khawzawl Division chu pakhatna an ni a, Serchhip Division pahnihna niin Lunglei Division pathumna an ni. Pu K. Lalrinthanga chuan certificate leh thilpek a hlan nghal a. Jt. Director (P) Pu K. Lalduhawma chuan lawmthu sawina in he hun hi a titawp a ni.