Vawiin khan Horticulture Department chuan 5-Kolasib (ST) Assembly Constituency leh 6-Serlui (ST) Assembly Constituency huamchhunga NLUP beneficiary te hnenah NLUP 3rd leh 4th Phase tanpuina an sem.

NLUP tanpuina hi Bialtu MLA te’n an bial chhungah an sem a. 6-Serlui (ST) Assembly Constituency bialtu MLA Pu K.Lalrinthanga, Parliamentary Secretary chuan NLUP tanpuina hi Community Hall, Bilkhawthlir leh Community Hall, Vairengte-ah semin, tanpuina dawngtu te chu tanpuina dawng zel tlak leh dinchhuahpui ngei thei turin a fuih a ni. He hun hi Pu R.Lalremsanga, Addl.DC,/ Nodal Officer, NLUP, Kolasib district chuan a hmanpui bawk. NLUP sem hi 3rd & 4th Phase a 3rd Installment niin, Kuhva chin thlangtu mi 146 ; 3rd Phase ah mi 100 leh 4th Phase-ah mi 46, te hnenah sem a ni a. Beneficiary pakhatah Rs.7,000/- theuha sem niin, sem chhuah zawng zawng hi Rs.10,22,000/- a ni.

5-Kolasib (ST) Assembly Constituency bialtu MLA Pu PC Zoramsangliana chuan NLUP tanpuina hi Synod Conference Hall, Diakkawn, Kolasib-ah a sem a. Semna inkhawmah hian Pu PC Zoramsangliana chuan NLUP chu mi taima leh thawkrim ten leirem an rah theihna tura tanpuina a nih thu sawiin, malsawmna dawng tlaka tanpuina sum dawn te hmang turin beneficiary te a chah a. Khuarel chhiatna tawrh avanga hmalak chhunzawm theilo te chhawmdawlna turin sorkarin ruahmanna a siam a ni, a ti bawk. NLUP sem hi 3rd & 4th Phase 3rd Installment niin, Kuhva, Serthlum, Lakhuihthei leh Iskut chin thlangtu mi 91 hnenah sem a ni a, 3rd Phase-ah mi 57 leh 4th Phase-ah mi 34 te an ni. Serthlum chingtu hnenah Rs.4500/- theuh, Lakhuihthei chingtu hnenah Rs.6,000/- theuh, Kuhva chingtu hnenah Rs.7,000/- theuh leh Iskut chingtu hnenah Rs.17,000/- theuh a sem niin, tanpuina sum semchhuah zawng zawng hi Rs.6,26,000/- a ni.