Serchhip a Horticulture Department chuan vawiin khan Serchhip Hmar Veng YMA Hall-ah Serchhip Cluster huamchhunga NLUP 2nd Phase tanpuina dawngtute hnenah 3rd Installment an sem a, Khuallian atan Pu Lawmkima, MCS, Nodal Officer, NLUP Serchhip District hman a ni a, Khualzahawmah Pu Andrew H. Lalremruata, MIS, Media Officer, NLUP Serchhip District hman a ni.

Khuallian Pu Lawmkima chuan Serchhip District chu Mizoram District zinga ram laili luahlumtu an nih bakah NLUP Pa Mizoram Chief Minister ni bawk Pu Lal Thanhawla bial awmna anih vangin NLUP ah thangchhuah ngei tura tan kan lak a ngai a ni a ti a, miretheite leh harsa zawk ten lei rem an rahna tura ruahmanna anih ang ngeiin theihtawp chhuah turin beneficiary te a chah a, thahnemngai tak leh taima taka hna kan thawh phawt chuan retheihna chhan tur a awmlo a ni a ti bawk. Tanpuina sum an dawn te chu Krismas bazaar nan an hman loh a beisei thu sawiin hlawhtling ngei turin a fuih a ni.

Khualzahawm Pu Andrew H . Lalremruata pawhin thusawiin hmangaih tak leh duhsak taka ruahmanna min siamsaktu Sawrkar rilru tin a tu nilo turin beneficiary te a chah a, nutling patling chhungkaw din ngam ten cheng heti zat mai a thlawna dinhmun siamna tura an dawng chu a lawmpui thu a sawi rualin dinchhuahpui nan hmang theilo chuan chhungkaw enkawl tak tak tlak kan ni em tih inzawhchian a ngai hle dawn a a hriat thu sawiin theihtawp chhuah turin a fuih a ni.

Serchhip Cluster a Horticulture Department kaltlanga NLUP 2nd Phase tanpuina dawngtu hi mi 215 an ni a, Serthlum, Lakhuithei, leh Tung chingtu te an ni.

Vawiina tanpuina sum an sem dan hi Serthlum - Rs. 9,000/-, Lakhuihthei – Rs. 8,000/-, leh Tung – Rs.10,000/- a ni.

Serchhip Hmar Veng Hall-ah hian Serchhip, Chhiahtlang, Hriangtlang, Lungpho, Ngentiang leh Thinglian a NLUP beneficiary te hnenah tanpuina hi sem a ni a, Serchhip leh Chhiahtlang a NLUP beneficiary te chu an bank account ah pawisa hi dahluh sak niin APR an ziak a, a bak zawng khuate hi sumfai a pek an ni.

Pu Lalhmangaiha, DHO, Serchhipin NLUP sem inkhawm hi kaihruaiin beneficiary te chu diktaka sum hmang turin a chah a, kumthar January thla chhungin an hmalak dan endik vek anih tur thu a sawi a ni.

Vawiinah vek hian Thenzawl VC Hall-ah Thenzawl, Buangpui leh Neihloh a NLUP 2nd Phase beneficiary te hnenah Horiculture Department hian tanpuina an sem bawk a ni.