Pu R.Lalrinawma, Dy. Speaker chuan vawiin chawhma dar 11:00 khan Mini Sport Complex Chite ah Zoram Entu Pawl leh FIWDC Peace Home te buatsaih International Day of Persons with Disabilities Programme a hmanpui.
He programme lian vak lo, rilru erawh khawih tak ah hian thu sawiin khuallian Pu R.Lalrinawma chuan rualbanlote chu sawrkar in a ngaihsak em em a, sawrkar hna za a pathum te chu an tana hauh sak a nih thu leh tunah chuan mi 45 laiin hna an chelh tawh thu sawiin rualbanlo nih vanga hnual mai lovin, theihna leh thiamna an neih ang ang te chu hmang tangkai turin a fuih a Mizote pawh tunah chuan kan changkang tawh a, mi pangngai ni thei lote chu rualbanlo ti phal tawh lovin, ‘Vohbik’ kan ti tawh a ni tiin khuallian chuan Rualban loh theihna hrang hrang a awm thu a sawi a. Duh vang reng nilo leh natna avangte a rualbanlo an awm laiin taksa pangngai ni si, ruihtheih thil in a tih piansual te an awm a, vawiin a rualbanlo te chu ngaihsaktu leh duattu, chhungte bakah sawrkar leh NGO etc. tam tak an awm a, an vannei em em a ni tiin thlamuang taka awm turin a chah.
Mizo Upa in Pian sualin tlai luat a nei lo an tih thu sawiin Pu R.Lalrinawma chuan vawiina mi pangngai te pawh hi vandual palh vanga rualbanlo thei vek kan nih avangin tun atanga midangte tana malsawmna ni tur leh rualbanlote ngaihsak nachang hre turin a sawm nghal a.
He ni puala hun hlimawm tak an hman nan khuallian hian Rs. 5,000/- a pe a, an hman tangkai tur wheel chair, beng dar leh zak dawmna tiang te a sem sak nghal a ni.
Pi Teresa Lalrinkimi, CBR (Community Base Rehabilitation) Coordinator in rualbanlo te chhawmdawlna tura hmalak dan leh tihtur te sawiin 1976 ah UNO ah din a lo ni tawh in kumtin 3rd December chu Rualbanlote Ni atan hman a nih dan te a sawi.
Programme kaihruaitu Pu Samuel Lalhmingliana, CBR Coordinator Peace Home chuan he programme an hman theihna atana thil petu mi inphal te hnenah lawmthu a sawi a.
Vawiina ‘Rualbanlote Ni’ hi hmun thumah hman a ni a, Tlangnuam leh Phulpui inkar khaw 16 leh Sihphir leh Zemabawk inkar khaw 16 ten Mini Sports Complex chite ah hian hmangin zaithiam larte nen infiamna hrang hrang neiin hun an hmang a. Tlai lamah Pari Chhangte Catering ten ruai an buatsaih sak chu an kilho ang.
