Vawiin chawhma kha I&PR Conference Hall-ah Joint Electricity Regulatory Commission for Manipur and Mizoram(JERC) hnuaia din State Advisory Committee(SAC) chu sawrkar hnenah kawlphetha chungchang bika rawtna thlen tur rel in an thukhawm a. SAC meeting vawi 16-na hi Pu A.Chhawnmawia, Member, JERC for Manipur and Mizoram in kaihruaiin SAC member te hriat duh zawhna hrang hrang te chu Er. L.Pachuau, Engineer-in-Chief, P&E Department in a chhang a ni.

Meeting ah hian electric connection zawng zawnga meter rintlak vuah vek chungchangte, Kawtthler entu electric lights a meter vuah tur chungchang, Electric Current pawttute Current hman dan inthlak danglam leh punna enfiah mek chungchangte, RGGVY, REDP, World Bank funded schemes, SLDC Electrical inspectorate, ZEDA leh Commercial accounting thiam P&E in a mamawhna te sawiho a ni. 100 % Metering chungchanga zawhna chhangtu Er.L.Pachuau, E-in-C chuan Mizoram chhunga khawpui mihring 10,000/- aia tam awmna 9 ah RAPDRP Scheme hmangin Meter hlui leh hman mekte chu LCD meter, maximum demand indicator(MDI) a thuam hmanga thlak vek tum a nih thu a tarlang a. Khawpui lian 9 nilo, hmun dang zawngah pawh 100% metering hi puitlin a nih tawh thu leh thingtlang hmun kilkhawr berah pawh electric connection nei phawt chuan meter an vuah vek tawh thu a sawi. Transformer lian leh sub-stations zawng zawngah pawh meter vuah vek tura hmalak a ni a ti.

Electricity Act, 2003 leh JERC M&M Regulation, 2013 in a phut angin Street light ah te pawh meter vuah vek tura tih a ni a. Street Light chhit en leh a chhia te thlak chungchang hi Aizawl khawpui chhung bikah chuan AMC hnuaia Local Council te kutah a awm thu P&E hotute chuan sawiin hmun dangah erawh LAD hnuaia Village Council ten mawh an phur thung tih an tarlang bawk a ni. Corporation ah P&E Department chu siam a lo nih hun a indang tur, SLDC Inspectorate leh ZEDA te changtlung taka hna an thawh theih nan SAC chuan Sawrkarah rawtna thlen a rel a. P&E in accounting system a hman mek CPWD accounting leh civil accounting te hi Corporation a lo nih chuan a hman tlak dawn loh tur thu sawi chhuah a ni a. Commercial accounting thiam chhawr a lo la tul tur chungchang pawh sawrkar hrilh nise tiin SAC chuan thutlukna a siam bawk a ni.

RGGVY hi P&E hotute chuan kumin December thla ah central sawrkar thu pek angin tih tawp a nih tur thu an sawi a. REDB pawh tih tawp thuai a nih tur thu tarlangin Novermber, 2014 khan award of works hnuhnung ber tur pawh tih chhuah a ni tawh a ni an ti. World Bank funded scheme hnuaia electric hrui thlun zawm hna chu P&E kut atangin Power Grid ten an lak tawh thu tarlan a ni bawk.