Mizoram Chess Association-in an buatsaih - 34th PS Dahrawka Memorial Chess Tournament 2014, ni 3 awh tur chu vawiin chawhma dar 10:30 khan Chhinga Veng YMA Hall ah Finance Minister Pu Lalsawta’n a hawng.
Tournament hawnna thu sawiin Minister chuan Chess game chu naupang, thalai leh kum upa lamte thlenga infiamna, thluak hman thiam ngai, game changkang, hautak si lo tha tak a ni tiin Mizoram Chess Association-in thahnemngai taka game hmasawnna tura hma an lo lak tawhna zawng zawngah lawmthu a sawi a, Chess game hmasawnna tura mi thahnemngai ten sum leh tha senga tournament an huaihawt thin avangin lawmthu a sawi bawk.
34th PS Dahrawka Memorial Chess Tournament 2014 hawnna inkhawm hi MCA President Pu Rochhunga Ralte, ex MLA-in a kaihruai a, MCA General Secretary Pu P.Lalchuanpuia’n MCA hmalakna te report pe-in tournament hming tumtu PS Dahrawka fanu Pi Thansangi pawhin a pa chanchin tawi a sawi bawk a. Kum 1940 atanga a pa-in chess a lo khelh tan thu leh Mizo zinga chess khel thiam hmasa ber a nih dan te leh a lo tuipui chhoh dan te a tarlang bawk a ni.
