Vawiin hian Lawngtlai Divisional Horticulture Officer, Pu L. Lalhmingmawia Pachuau ruahmanna in Chawntlangpui khua Rangkuai Theihai chingtute tharchhuah Theihai pum 2600 chu Aizawl leh Lunglei a zawrh atan thawn phei a ni.

Lawngtlai leh a chhehvel khuaa Theihai chingtuten an Theihai hralhna lama harsatna an tawh mek tanpuina chikhat atan Lawngtlai Divisional Horticulture Office chuan Department motor (Pick-up) thawh in, heng Theihai te hi Aizawl leh Lunglei a zawrh atan a thawn sak a. Vawiin a mi hi a tum hnihna niin he ti hian Theihai pum 5600 vel an thawn sak tawh a ni. A hralhna lamah harsatna a awm loh chuan a theih chen chen thawn sak an inhuam thu Horticulture Department Officer chuan a sawi.

Theihai te hi Horticulture Directorate Office, Aizawl bul hmun remchang atanga hralhchhuah tur a ni.

Rangkuai Theihai (Kawlchaw Theihai an tih bawk) hi Theihai tui tak mai a ni a, khawvel hmun dangah pawh heng aia tui hi a awm bik vak chuang lo niin Pu L. Lalhmingmawia Pachuau chuan a sawi a, Mizoram in Theihai tui kan nei ve a ni tih hi mipuiten hriain min leisak nachang hria se kan duh tak zet a ni a ti bawk.