Vawiin khan Lawngtlai khaw bul, Chawntlangpui khua Pu Lalbiakdika Theihai (Rangkuai) pum 3000 chu Lawngtlai Divisional Horticulture Officer Pu L. Lalhmingmawia Pachuau hmalakna in Aizawl lama zawrh atan thawn phei a ni.

Pu L. Lalhmingmawia Pachuau chuan, “Theihai tui tak, khawvel hmun dangah pawh hei aia tui tur awm vak tawh chuanglo a riral thin hi a uiawm em em mai a, Divisional Horticulture Office chuan a bultan nan Pickup Truck thawhin Aizawl lamah kan phur phei chhin dawn ani, min lei sak duh an that dan a zirin inthawn chhunzawm zel dan te ngaihtuah tum ta ila kan ti a ni” a ti. Chutihlaiin, Theihaite hi a nget a awm ve avangin Aizawla thawn phei tur hi chu a hranpa a thliar fel sa vek, a nget awm lo thei tur bera duan ani a, Theihai huan, uluk taka enkawl atang chauhva lak kan tum dawn a ni, a ti bawk.

Vawiina Theihai pum 3000 an laksak neitu Pu Lalbiakdika chuan Theihai huan kung 1000 awmna a nei a, khaw chhung leh kawngkamah an hralh ve nual tawh thu sawiin pum 30000 vel hralh tlak a la neih theih a in beisei. A ni ang bawka Theihai hralh tur nei chhungkaw engemawzat helai khaw chhehvelah hian an la awm a ni. Rangkuai (Kawlchawl) Theihai tui ngei an lei theih nan, a leitute chu fimkhur turin a chah a, ‘Rangkuai’ tih hi Burma rama Zakhai hnam tawng a ni a “Awm Phir” tihna a ni. He Theihai hi a awm a phir deuh phak bik a, chuta tang chuan Rangkuai dik tak a hriat hran theih a ni, a ti. Lawngtlai leh a chhehvel khuaah te hian hetiang Theihai, a la chhuak hmasatute khaw hming chawia Kawlchaw Theihai an tih bawk hi tam tham tak tharchhuah a ni thin a, amaherawh chu a hralhna lamah Theihai thartute hian harsatna an tawk thin a ni.

Theihai thawnchhuah dawn hian Chawntlangpui Bazar Shed ah inkhawm tawi te buatsaih a ni a, hetah hian Pu L. Lalhmingmawia Pachuau bakah Pu K. Saitluanga, District Information and Public Relations Officer bakah khawtlang hruaituten thusawina hun an hmang a ni.