Vawiin khan Mizoram State Child Protection Society, Social Welfare Department leh Govt.T.Romana College tangkawp buatsaih “Child Rights and Child Protection:Issues and Challenges” tih thupui hmangin I&PR Auditorium-ah ni hnih awh Seminar neih a ni a. Social Welfare Minister Pu PC Lalthanliana chu khuallian a ni.

Pu PC Lalthanliana chuan naupangte dikna chanvo humhalh  leh chanhaiten enkawlna tha an dawn theih nan sawrkar laipui leh state sawrkar chuan hma a la mek tih sawiin tunhma lam kha chuan hemi kawngah hian hmalakna thui tak sawi tur awm lo mahse kum 2000 khan dan thar Juvenile Justice (Care and Protection of Children) Act siam a ni a, Mizoram pawhin Juvenile Justice (Care and Protection of Children) Rules, 2010 a lo nei ta a ni, a ti. Minister chuan Mizoram sawrkar Social Welfare Department hnuaiah Integrated Child Protection Wing din niin hnathawktu pawh 300 vel lai lak an ni tawh, tiin an ni hian State sawrkar hnuaia naupang chanhai enkawlna Home 44 a neih mek chu an vel reng a ni a ti. Heng home hrang hrangah hian naupang 1200 an awm a, dan ang thlapa fa lak (adoption process) kalpuiin 2012-13, 2013-14, 2014-15 chhungin an naupang enkawl zinga 220 te chu ramchhungah adopt an ni a,  ram pawna naupang adopt tawh zat hi 21 an ni, a ti a. Sawrkar duhthusam chu naupangte hi Home –ah seilian tlang lo sela, an mamawh zual chhung awm tir phawt a, chumi hnuah anmahni hmangaihtu tak tak te hnena seilen tir a ni, Social Welfare Minister chuan a ti bawk. 

Seminar hawnna inkhawm hi coordinator P.B Lallawmawmi, Asst Professor , Govt. T.Romana College (GTRC) chuan kaihruaiin GTRC Principal Dr.Lalrintluangan kalkhawmte lawman thu a sawi a. Prof. Srinibas Pathi, Dean School of Social Sciences, MZU chuan Seminar thuhmahruai sawiin Pi Laldikkimi, Deputy Director , Social Welfare Department chuan thu tawi a sawi bawk.

Seminar chhung hian mi 16-in Paper an present ang a. State pawn atanga lo kal tur hian Lalhmingmawii, University of Hyderabad beisei a ni.