Nizan khan Health Minister Pu Lal Thanzara chuan a bial Aizawl North III huamchhunga Hunthar Volleyball Club (HVC) players leh jersey tlangzarhna hun MHIP Hall, Huntharah a hmanpui.
Pu Lal Thanzara chuan Hunthar chu Volleyball khel thiam veng tia hriat hlawh, he game tana sulsutu leh hmahruaitu, Mizorama thiam ber nihna dinhmun hial hauh pha tawh thin an ni, a ti a. Volleyball club-te intuaithar lehin veng chhung mi inphal leh volleyball-a tuimite hmalaknain tun dinhmunah club tha tak an ding leh chu lawmawm tiin infiammite hlawhtlin nana pawimawh mahni inthununna leh thawhrimna nei turin players-te a chah a ni. Sorkarin tunlai khawvel hi thalaite khawvel a nih hriain thalaite tan infiamna leh an tuina zawng kawng dangah hma a la mek tih Minister chuan a sawi a, tun dinhmunah Mizote chu India ram chhung leh ram pawn thleng pawha infiamna kawng hrang hranga hriathlawh kan ni chho mek chu a lawmawm hle a ni, a ti a. Mizoram Volleyball Association (MVA) hruaitute leh infiammite hian Volleyball chu Mizoramah hei aia nasa in an vawrh kang chho thei tih hre turin a chah a ni.
MVA President Dr.Lalmalsawma pawhin thu sawiin Mizoramah Volleyball vawrh lar mek a nih thu leh National Referee pakua neiin game hrang hrangah National Referee ngah ber an nih thu a sawi a. Ram pum huap Volleyball tournament pawh Mizorama nghah a nih ngei theih nan phai lam thuneitute nen inbiakna an neih mek thu a sawi.
Pu Lal Thanzara hian club tanpui nan cheng 7000 a hlan a, Dr Lalmalsawma pawhin cheng 5000 a pe a ni.
Player leh jersey tlangzarhna hun hi Hunthar Volleyball Club President Pu VL Malsawma Renthlei chuan a kaihruai a. Aizawl veng hrang hrang leh Aizawl pawn hmun thenkhat atangin player lakhawmin Coach Vanlalmawia kaihhruaina hnuaiah player 11 leh an jersey thar phochhuah a ni.
HVC hi kum 2005 a din niin MVA Super League champion an lo ni tawh a. Hun engemawchen an chawlh hnuah intuaithar lehin kumin atang hian First Division-ah an inhlangkai leh a ni.
