Champhai Kanan leh Vengthlang inrina lei minna hmun then fai hna, State Disaster & Rehabilitation atanga Rs nuai 40 dawn hmangin chawlhkar khat chhung thenfai hna thawh a nih hnuah peihfel thawkhat a ni. He lai hmun hi kum 2013 August 28 zing khan in dinglai 23 huamchhunga chhungkaw 29 ten sahimna zawnga an rauhsanna hmun leh chhungkaw 7 ten in leh lo an channa hmun a ni.
Helai hnathawh hi official ten vil rengin, District Disaster Response Team Chairman leh Champhai DC ni bawk Pu H. Lalengmawia chuan helai leitawlh vanga chhiatna thleng thei laka mipui leh lirthei tlan vel te an him theihna tur chu ngaih pawimawh ber a nih thu tarlangin, tuna sum neih sa hmang chuan thui tak hmalak theih anih rih loh tur thu leh lei paihna khawl (Excavator) in a thawh piah lamah mihring tha hmanga thawh zui a tul tur thu a sawi a. Leitawlhin kum 2 chhung zet Kanan Veng leh Vengthlang inkal pawhna kawngpui pakhat a hnawhpin tawh chu sial tlang a, lirthei te chi leh lirthei laihawl (Light & Medium vehicle) zawh theih tura cheibawl a nih tur thu a tarlang bawk.
Champhai 74 RCC ten leitawlhna hmun kawngpui thlanglama lung an rem siam that ngaite chu lirthei vak vel tana him ngei tura siam that a nih tur thu DC chuan sawiin, hnathawh chhunga lirthei kal vel khaihlakna thleng thinah mipuite dawhtheihna chu lawmawm atih thu leh chak zawk a hna thawh anih theihna tura Traffic dan siamte tha taka zawm a ni chu lawmawm atih thu a sawi rualin, helai hmun paltlangtute chu fimkhur turin DC chuan a chah bawk.
DC hi 74 RCC Officer Commanding Er. Prakash Kumar, Champhai PHE SE Pu Lalrammawia leh Official dangte bakah khawtlang hruaituten tawiawmna in helai hnathawh kal mek hi an enfiahpui reng thin a ni.
