India ram zirna kal zela policy thar duan tum mek chungchangah ram chhung hrang hranga mite ngaihdan a zau thei ang bera la tura inrawnkhawmna (New Education Policy Consultation) chu Champhaiah pawh District Education Department hmalakna in vawiin khan Education Conference Hall leh District SSA Conference Hall-ah huam zau taka sawmte hovin inrawnkhawmna a buatsaih.
He inrawnkhawmna hunah hian mitin tana zirna kawng inhawn theih dan tura rawtna chhawp chhuahte ngaihtuah ho niin, kum lama upa zawkten High School leh a chunglam thleng pawh a zirna leh thiamna an neih ngei theih nan leh zirlaiten an thlen chinah chhawr tlak thiamna an puak chhuah ngei theihna tura zirna tih phuisuina dan turte, zirlaiten huam zau zawka zirna an dawn theihna tura zirtirtu thiam leh tha neih theih dan tur leh zirna in a tunlai thiamna hmanga inbiak pawhna hmanrua (Information & Technology system) thuk zawka sengluh leh hman tangkai dan turte sawihovin rawtna pawh siam a ni.
He zirhona hun hi Champhai SDEO Pu C. Lalbiakzauva leh a thawhpuiten an kaihruai a. Zirna in hrang hrang (PS-HS) Headmaster-te, College Lecturer-te, Pensioner-te, Tlawmngai pawl hrang hrang hruaitute bakah zirna kawnga mi thahnem ngaite an kal khawm a. He consultation programme hi District chhung hmun hrang hrangah neih chhoh mek zel a ni bawk.
